Параньга посёлкысо школышто шукынжо руш, татар йоча-влак тунемыт гынат, марий ӱдыр-рвезе-шамыч поснак чолга улыт. Нунын кокла гыч иктыже – 9-ше классыште тунемше Елена Трофимова. Ӱдыр чолгалыкшым тӱрлӧ мероприятий ден конкурсышто чӱчкыдын ончыкта.
– Мый марий улмем дене моткоч кугешнем. Ача-авам изи годсек шочмо йылме дек шӱмаҥденыт. Марий йӱламат жаплена. Классыштына марий-влак кумытын веле улына. Туге гынат икте-весе коклаште марла кутырена. Южо еҥ калык тувырым чия да «Марий улам» манеш. Чын, но, мыйын шонымаште, марий шӱлыш вӱрыштак лийшаш. Ме шочмо тӱвырам вияҥдымашке, йылмым арален кодымашке могай-гынат надырым пыштышаш улына, – ойла ӱдыр.
Ленан сеҥымашыже ятыр. Районышто эртаралтше Якимов, Герасимов лудмашлашке кажне гана ушна да сеҥыше-влак радамыш лектеш. Марий серызе-шамыч кокла гыч Миклай Казаковын возымыжо чонжылан поснак лишыл. Почеламутым сылнын лудаш аваже Эрвика Лазарьевна туныкта.
– Шке семын подышто шолаш куштылго огыл, чолга марий ӱдыр-рвезе-влак дене кылым кучыман. Садлан тений кеҥежым Марий самырык тукым слётыш миенам. Тӱрлӧ кундемыште илыше самырык еҥ-шамыч дене палыме лийынам. Марий калык йӱла нерген шуко ум пален налынам да утларак шымлаш кумылаҥынам, – ойла Лена.
