Чорайыште – марий шӱлыш

Пошкырт кундем Мишкан районысо Чорай школ (кызыт Я.Ялкайн лӱмеш марий гимназий) шуко тунемшылан марий тӱняшке корным почын. Серызе Я.Ялкайн, журналист да краевед Г.Зайниев, Марий Элын калык писательже В.Абукаев-Эмгак, Марий Элын сулло артистше А.Асмаев да моло уста еҥ-влак тыште шинчымашым погеныт. Чылажат шочмо йылмым йӧратымаш гыч тӱҥалын.

Кызыт гимназийыште марий йылмым да литературым туныктышо А.Л.Юзукбаева (снимкыште йоча-влак дене пырля)  шочмо йылмым йӧраташ кумылаҥда. Гимназийыште – 210 ӱдыр-рвезе. Нуно чыланат марий йылме (шочмо йылме семын) ден литературым тунемыт.

– Йоча-влак шочмо йылмыштым куанен шымлат, но ончычсо семын огыл. Нелылык шижалтеш. Йочасадыште, школышто моло предметым вӱдымӧ годым туныктышо-влак шукыж годым рушла умылтарат,  – ойла Анжелика Леонидовна.

Марий йылмым келгынрак тунемаш, тудын сылнылыкше дене палыме лияш «Шочмо йылмым йӧратем» кружок полша. Тӱрлӧ марий мероприятийым эртарат, марий калык йӱла, пайрем-влак дене палдарат, оҥай верлашке экскурсий дене коштыт, уста еҥ-влак дене вашлийыт, «Чолман» газет дене пеҥгыде кылым кучат. Лектыш уло: тунемше-влак тӱрлӧ конкурс ден олимпиадыште сеҥышыш лектыт. Эн тӱҥжӧ – марла кутырат да марий улмышт дене кугешнат.

Шочмо йылмым арален кодымаш А.Л.Юзукбаевам моткоч тургыжландара:

– Тиде уло калыкын пӱсӧ йодышыжо. Мемнан, туныктышо-влакын, ик эн кугу пашана. Тидын нерген погынымашлаште, совещанийлаште чон коржын каҥашена. Йоча марла кутырыжо манын, кажне туныктышо тыршышаш.

 

  • Христина Александрова

    «Ямде лий» газетын редакторжо.

    Related Posts

    «Йылме» ила!

    Марий йылмына моткоч поян. Тӱрлӧ кундемыште тӱрлӧ семын кутырена, ик значениян шомакым тӱрлӧ семын ойлена. Диалект ден наречий-влак улыт. Нунын кокла гыч шагал кучылталтшылан кас-йӱдвел наречий шотлалтеш. Тудо Виче, Угарман…

    Мотор ялем

    Шочмо вершӧр деч шерге нимо уке. Мыйын шочмо ялем – Елтек (Байгелде). Перепись почеш ялна 1723 ийыште тӱҥалтышым налын. Ойлат, пуйто тиде сылне верышке изак-шоляк Айгелде ден Байгелде толыныт. Байгелдылан…