Школысо психолог могай пашам шукта? Тиде йодышлан Морко район Коркатово лицейын психологшо А.Ю.КОЛЬЦОВА вашмутым пуа:
– Йочан икымше классыш тунемаш толмекше, психологын пашаже тӱҥалеш. Изирак класслаште йоча-влак икте-весышт дек писынрак тунемышт манын тыршена. Кыдалаш класслашке куснымо годым нелылык ынже лек манын, тӱрлӧ ой-каҥашым пуэна. 9-ше, 11-ше класслаште тунемше-влакым ОГЭ-м, ЕГЭ-м сайын кучаш ямдылена.
Тӱҥ шонымашна – тунемаш йӧным ышташ, кажне йочан вияҥмыжым эскераш да неле ситуаций гыч лекташ полшаш. Ме тӱрлӧ темым тарватена. Тунемше-влак тамакым шупшаш ынышт тунем, наркотикым ынышт кучылт, уда корныш ынышт шогал манын, профилактике пашам эртарена. Икшывын койыш-шоктышыжым да ончыкылык илышлан ямде улмыжым аклымаш Россий мучко эртаралтеш. 13-18 ияш йоча-влак компьютер дене тестированийым ыштат. Тренинг-влакым изирак тӱшка але посна йоча дене эртарена. Ача-ава-влак дене кылна пеҥгыде. Лекше йодышым писын да жапыштыже рашемдаш тыршена.
Изинек эмганен кушшо йоча-влаклан посна тунемме план уло. Логопед, психолог, туныктышо-влак нунылан келыштарыме программе почеш шинчымашым пуат. Йочан психикыже ынже эмгане, экшыкым ынже шиж, моло семынак пырляште тунемже манын, ятыр пашам шуктена.
