Россий Федерацийын президентше В.В.Путин 2024 ийым Ешын идалыкше семын увертарен. Еш дене кылдалтше ятыр мероприятийым, конкурсым, фестивальым тений эртараш палемдыме. Нунын кокла гыч иктыже – «Всей семьёй» российысе проект. Ача-ава да икшыве-влаклан куштылго да оҥай заданийлам пырля шуктыман. Кажне арнян у заданий темлалтеш. Тидын нерген фотом ыштыман, соцкыллашке #всейсемьёй, Марий Эл гыч ушнышо еш-влаклан эше #всейсемьёй12 хэштегла дене вераҥдыман. Марий Эл гыч ты проектыш 300 утла еш ушнен. Нунын коклаште – Волжск олаште илыше Тимофеевмыт еш.
– «Всей семьёй» проект нерген пален налмек, ушнаш вигак кумылаҥна. Икымше заданий мыланна моткоч куштылгын пуалтын, вет у ий кожым ме кажне ийын ешге сӧрастарена. А ынде кажне арнян, мом ыштыман манын, у пашам чон вургыж вучена. Ты проект ешыште вашкылым эшеат пеҥгыдемда, творчески шонаш да шукырак жапым пырля эртараш тарата», – шонымашышт дене пайлалтыч Тимофеевмыт.
Надежда Алексеевна ден Игорь Николаевич София да Анна ӱдырышт дене пырля икте-весылан пӧлекым ямдыленыт, У ийым еш дене пырля вашлийыныт. Проектын вес заданийже почеш пельменьым иквереш ышташ кӱлын. Нунын фотоштым ик эн ойыртемалтше семын палемденыт. Кужу теле канышыште курык гыч мунчалтеныт. «Девочка из города» кином пырля ончымаш поснак келшен. София ден Анна Кугу Ачамланде сар нерген шинчымашыштым пойдареныт. «Читаем всей семьёй» заданийым шуктен, шӱм-чонлан лишыл книгам лудыныт. Такшым Тимофеевмыт книгагудыш чӱчкыдын коштыт. Тушто эртарыме акций ден конкурслаш еш дене ушнат.
Надежда Алексеевна ден Игорь Николаевич йӧратыше шӱмыштым 2008 ийыште ваш ушеныт. Нуно илышын кажне татшылан куанен да тауштен илат. Игорь Николаевич чоҥышылан пашам ышта. Тудын илышыштыже спорт кугу верым айла. Волжск оласе «Факел» футбол командын тале защитникше, Ярамарий ялысе хоккей командын ӱшанле еҥже. «Таҥасымаш годым пелашем да икшывем-влакын пелен улмышт мыланем вийым ешара», – ойла еш оза.
Чолга да уста Надежда Алексеевна Волжск оласе краеведческий тоштерыште фонд-влакын тӱҥ аралышыжлан 2009 ий гыч пашам ышта. Кызыт кокымшо йоча дене мӧҥгыштӧ шинча. Туге гынат, жапым муын, оласе йочасадыште «Родной край» ден «Весёлый английский» кружок-шамычым вӱда.
Мужыр пелашын чон падырашышт – София ден Анна ӱдырышт. Кугуракше, София, Волжск оласе 9-ше номеран школышто 6-шо классыште тунемеш. Изиж годсек лишыл еҥже-влакым сеҥымашыж дене куандара. Ныл ияшыж годсек кушташ коштеш. «Движение Первых» Российысе толкынын Волжск оласе пӧлкажын еҥже, школысо «Родина» военно-патриотический клубын чолга участницыже, юнармеец. Баскетболла модмаште шуаралтеш.
Анна кок ияш. Изи гынат, акаж гаяк чулым. Сайын кутырен огеш мошто гынат, алфавитым тӱрыс палымыже, лу марте шотлен, тӱс-влакым ойырен моштымыж дене кажныжым куандара, тыгодым ӧрыктара.
Надежда Алексеевна ден Игорь Николаевич шочшышт дене пырля пӱртӱсыш лекташ йӧратат. Телым курык гыч мунчалтат, коньки дене коштыт. Кеҥежым Кичиерыште але Яльчик ер воктене чӱчкыдын канат. Кушкын толшо тукымым пӱртӱсым йӧраташ да аралаш туныктат.
– Еш – тиде нимо дене таҥастараш лийдыме пиал да поянлык. Лишыл еҥ-влак кажне сеҥымашлан куанат, неле годым полыш кидым шуялтат. Кастене паша деч вара лач ешыште чон кана, вий ешаралтеш. Тек кажне ешыште йӧратымаш, пагалымаш да умылымаш озаланат», – ойлат Тимофеевмыт.
