Йошкар-Олаште верланыше Республикысе йоча да самырык-влак-лан йоча технике усталык рӱдерыште легоконструирований, робототехнике, судомоделирований, 3D моделирований, авиамоделирований, анимаций да моло кружок-влак пашам ыштат. «СтИК» йоча студий уло. Тудым Н.В.Шаропин вуйлата. Тушто игровой кинолан да мультимедийлан кугу тӱткышым ойырат.
Студийыште йоча-влак фильмым тӱҥалтыш гыч мучаш марте ямдылаш тунемыт. Тудо икмыняр йыжыҥ гыч шога. Тидын дене Николай Валерьевич палдара:
– Эн ондак фильмым але тыглай видеом могай темылан войзышашым рашемдыман. Тиде куштылго паша огыл. Ик минут веле шуйнышо видеоштат ала-мом оҥайым, ойыртемалтшым ончыктен моштыман. Кокымшо йыжыҥ – сценарийым возымаш да тудлан сӱретым ямдылымаш. Войзашлан командым чу-мырыман. Кушто, мом, кузе сниматлыме нерген ончылгоч каҥашыман. Вес йыжыҥ эн оҥай – войзымаш. Тылеч вара кадр-влакым компьютерыш кусарыман да келшыше программе дене фильмым чумырыман. Кадр-влакым йӱкаҥдыман, сӧрастарыман, титрым возыман. Тиде видеомонтаж маналтеш. Кином войзаш куштылго, а оҥай сценарийым возаш нелырак. Тидлан фантазий сайын пашам ыштышаш. Садлан йоча-влаклан шуко книгам лудаш да сай фильм-влакым ончаш тыланем.
