Финн-угор калык тӱшкаш 16 калык пура: венгр, хант, манси, карел, финн, ижор, вепс, эстон, лив, марий да молат. Нуно шке калыкышт, тӱвырашт нерген мом шонат? Шочмо калыкышт мо дене кугешнен кертеш?
Раиса ВОЛКОВА, Удмурт кугыжаныш университетын студенткыже:
– Ме, удмурт-влак, шагалын улына гынат, шуко мо дене кугешнен кертына. Бурановысо кована-влакым тӱня мучко палат. Кокла шот дене ончалаш гын, нуно 70 ияш улыт. Репертуарышкышт тошто удмурт муро-влак пурат. Ме кумдан палыме конструктор Михаил Тимофеевич Калашников, семмастар Пётр Иванович Чайковский, олимпийский чемпионко Алина Загитова дене моткоч кугешнена.
Игорь КОЛЕСОВ, поэт:
– Мый изьватас улам. Ме коми калык тӱшкашке пурена. Кугезе коча-кована-влак йӱштӧ йӱдвел кундемыш ныл курымат пеле ончыч толыныт. Ял, черке-влакым чоҥеныт. Ненец калык деч пӱчым ончаш тунемыныт. Ижем диалектнам, калык вургемнам да кугезе коча-кована-влакын йӱлаштым арален кодаш тыршена. Ик эн тўҥ калык пайремна – Луд (олык). Шудым ямдылыме пагытыште еҥ-влак олыкыш канаш лектыт. Ижем ӱдыр-влак олыкышто мурен-куштен кертышт манын, имнешке-влак олыкым тошкеныт.
Борис ЕРЮШОВ, амалкалче:
– Эрзя йылмына муро гай йоҥгалтше, калык вургемна мотор, тӱрлӧ тӱсан. Историйна, фольклорна моткоч поян. Ме «Масторава» эпос, «Эрьмезь» поэмына, «Раськень Озкс» кумалтыш пайремна, Пургаз калык геройна, 1670-1671-ше ийласе кресаньык сар годым Арзамасс уездысе куржшо да крепостной-влакын отрядыштым вуйлатыше Алёна Арзамасская, сӱретче, скульптор Степан Эрьзя, уста йылмызе, туныктышо Анатолий Рябов, фольклорист, музыкант Йовлань Оло, серызе Маризь Кемаль дене кугешнена.
