Йошкар-Олаште «Виктория» йоча музыкальный театр луымшо ий пашам ышта. «Вековой орнамент малой родины моей» проект почеш марий спектакльым шындаш 10-13 ияш марий йоча-влакым погат. Режиссёр-постановщик – Республикысе курчак театрын артистше Анжела Тихонова. Спектакльым войзат да «Шонанпыл» передачыштыже ончыкташ тӱҥалыт.
Икымше спектакль В.Абукаев-Эмгакын «Юзо шиялтыш» пьесыж негызеш шындалтеш.
– Тыгай постановко самырык тукымым шочмо йылмым, тӱвырам, йўлам аралаш, жаплаш, марий улмыж дене кугешнаш тарата манын ӱшанем. Спектакль ожнысо марий модышлан, куштымашлан, мурылан поян. Шиялтыш сеҥымашын символжылан шотлалтеш. Тӱҥ герой-влак Эчан ден Пампалчын образышт гоч тӱрлӧнелылыкым чытен лектын, осалым сеҥен кертмаш ончыкталтеш. Эше у спектакль-влак ямдылалтыт. Ме марий йоча-влакым вучена, – ойла Анжела Артуровна.
