Йошкар-Ола гыч изак-шоляк Глеб ден Егор Мамаевмыт тӱрлӧ аланыште вий-куатыштым тергат. Коктынат Семёновка селаште верланыше 21-ше номеран кыдалаш школышто тунемыт: Глеб – нылымше классыште, а Егор –кокымшышто.
– Олаш илаш куснымеке, эргына-влакым могай занятийыш але кружокыш колташ кӱлмӧ нерген шоненна. Пелашем ден коктын дзюдо спорт нерген ончычшым шукыжым пален огынал. Ты корным Глеб шкежак ойырен налын, а ме тудлан полшена, – ойла Снежана авашт.
Глеб дзюдо дене 1-ше класс гычак кылым куча. Урок деч вара ты кружокыш кажне кечын гаяк вашка. Изажым эскерен, Егорынат кружокыш кошташ кумылжо лектын. Тудат ынде кок ий утла коштеш. Изак-шоляк шке коклаштышт моткоч келшат, пырля модыт, вашла эреак полышкалат, умылтарат, жапым иквереш эртарат.
Дзюдо спортлан нуным тренерышт Андрей Ильич Ялпаев шӱмаҥда. Ты кружоклан кӧра рвезе-влак шуко еҥ дене палыме лийыныт, ятыр йолташым муыныт. Глеб таҥасымашлашке чӱчкыдын ушна. Ик гана веле огыл ончыл верыш лектын. Шуко диплом ден медаль погыненыт.
Тидын деч посна изак-шоляк Мамаевмыт Йошкар-Оласе 5-ше номеран йоча сымыктыш школышто семӱзгарым шокташ тунемыт: Глеб – гитарым, Егор – фортепианом, тыгак вокалыш коштеш. Тек чолга рвезе-влак лишыл еҥыштым сеҥымашышт дене эреак куандарат.
