Эре ончыко кайыше, чулым, шонымашке шуаш тыршыше ӱдыр-рвезе-влакым «Артек» тӱнямбал йоча рӱдерышке ий еда погат. Н.А.Заболоцкий лӱмеш 2-шо номеран Шернур школышто шымше классыште тунемше Евгения Иванова чыла шотыштат келшен толеш. Мастарлыкшым тӱрлӧ конкурсышто терга, волонтёр пашам шукта. Сеҥымашыже-влак рӱдерысе «Морской» лагерьыште канаш йӧным ыштеныт.
– Артист койышемым изинек вияҥденам. Тидлан авам Светлана Николаевна шӱкалтышым ыштен. Йоча-влакым мураш туныктымыжым ужын, мыят кумылаҥынам. Муро деч посна илаш йокрок, шонем. Сценыш лекмеке, шкемым мурышо кайык гай шижам. Ончаш толшо калыкын совым рӱж кырен вашлиймыже кумылемым нӧлта, – ойла Евгения.
– Ӱдыр И.Н.Молотов лӱмеш йоча сымыктыш школысо «Хоровое пение» пӧлкам тений тунем пытарен. Ты школ тӱрлӧ вере лияш, у еҥ-влак дене вашлияш йӧным ыштен. Кодшо ийын «Творческие люди» проект полшымо дене Санкт-Петербургыш экскурсий дене миен. Тений шошым «Орлёнок» всероссийский йоча рӱдерыште лийын.
– «Артекым» юзо тӱня манаш лиеш. Тушко логалмемлан моткоч куаненам. Индешымше смене «Движение вверх» маналтын. Ме чынжымак эре кӱшнӧ лияш тыршенна. «Делай, как Артек!» фестивальыште сеҥышыш лектынна, – палдара Евгения.
Ӱдыр марлат, рушлат мура. «Элым аралыше-влаклан», «Голос детства», «Авам дене пырля» республикысе конкурслаште сеҥышыш лектын. Тыгак «Грация» куштышо ансамбльыш коштеш.
