Йоча-влак угыч парт коклашке шинчыныт. Урокышто кажне кечын у темым тунемыт. Тудым пеҥгыдемдаш манын, мӧҥгысӧ пашам ыштыман. Шуко йоча, утларакше тӱҥалтыш класслаште, ача-аван полышыштым вуча. Мыняр ий марте йоча пелен шинчыман? Тиде йодышлан вашмутым психологий да педагогике, медицине да социальный полышым пуышо «Детство» рӱдерын учитель-дефектологшо Л.К.Стадухина пуа:
– Изирак класслаште тунемше-влак жапым чын кучылтын огыт мошто. Сандене ача-ава-влаклан эн ончыч тидлан туныктыман. Кажне кечын урокым ик жапыште ыштыме, жапым канаш, малаш, модаш ойырымо нерген умылтарыман. Мӧҥгысӧ пашам ыштыме годым темым умылымыжым эскерыман. Шкевуя тыршыме годым мокталтыман. Кугурак класс марте урокым ышташ полшымо дене йоча ача-авалан веле ӱшанаш тӱҥалын кертеш. Шке пӱжвӱдшым йоктара, жапым чын кучылтеш гын, «сапым» изиш луштараш лиеш. Туге гынат тӱткӧ лийман. Нине ой-каҥаш-шамычым шотыш налыда гын, икшывыда шке вуя пашам ышташ, мутым кучаш, шке вийжылан ӱшанаш тунемеш.
