Йоча – илышын пеледышыже, маныт калыкыште. Тудо висвис, роза, тюльпан гаяк тӱзланыже да пеледалт кушшо манын, шуко ӱнар кӱлеш. Ача-ава-влак икшывышт таза, виян лийже манын, тӱрлӧ йӱлам шуктеныт. Йоча йол ӱмбак шогалаш тӧча, чӱчкыдын шӱртньылеш, камвозеш да ӱшанлын огеш ошкыл гын, кугезына-шамыч кепшылым руэныт. Тиде йӱла кызытат аралалтеш мо? Пален налаш «ВКонтакте» соцкылысе лаштыкыштем йодмашым эртарышым. Илалше-влак веле огыл, самырык-шамычат «Кепшылым руымашым» сайын палат улмаш. Тидыже моткоч куандарыш.
Ойырымо кечын киндым пыштат, сортам чӱктат да Шочынава Юмылан, Сурт Юмылан пелештат. «Йоча пеҥгыдын ошкылжо, ончыкылык илыш корныжо волгыдо да куштылго лийже» манын йодыт. «Кепшылым руымаш» йӱлам ешыште кугурак ийготан еҥлан ӱшанат. Пӱкеныш киндым, шушо руашвочкым але тичмаш ведра дене вӱдым шындат. Пӱкен йыр йоча кум гана шке ошкедышаш але тудым иктаж-кӧ вӱдышаш. Ача-ава-влак шке могырышкышт сымыстарен кертыт. Кова але коча ошкылшо икшыве почеш «Кепшылым руэм, кепшылым руэм» ма-нын, товарын пӱсыж дене кандырам руымо семын кӱварыш тушкалтен-тушкалтен кая. Тидын годым руышо деч йодыт: «Мом ыштет?» Тыге ваштештыман: «Кепшылым руэм» але «Мичун кепшылжым руэм». Кум гана йодман да кум гана вашештыман. Тыгай йӱлам мучашлымеке, «Ынде сайын кошт, кид-йолет лывырге лийышт, капкылет куштылго лийже, илыш корнет кужу лийже» манын сугыньлат. Ава-ача куанымышт дене, «Коват (кочат) кепшылым руале, ынде пеҥгыдын ошкылаш тӱҥалат» манын, йочалан ӱшандарен каласат. Южо кундемыште ты йӱлам ава деч йышт шуктат. Тыгак южышт кепшылым, арням коден, кум гана руат. Йӱлам шуктымо деч вара йоча йол ӱмбалне чынжымак пеҥ-гыдырак шогаш да писынрак ошкылаш тунемеш.
Теве Шернур район Тамшэҥер ял гыч Т.С.Воронцова лу уныкажланат «Кепшылым руымаш» йӱлам эртарен. Тидын дене тудын ӱдыржӧ Алевтина Волкова палдарыш:
– Мыйын кум икшывем уло: Савелий, Катя да Максим. Чыланыштын кепшылыштым руэнна. Йоча-влак кӱчык жапыште пеҥгыдын ошкедаш тӱҥалыныт. Ешна моткоч марий шӱлышан. Шочмо авам тыгак уныкаже-шамычым шинча вочмо деч арала, азашт годым шондашыштым луктын. Марий пайремымат эртарена. Самырык тукымым тидын дене палдарашак тыршена.
Р.Н.ПЕТРОВА (Морко район):
– Унчо кундемыште «Кепшылым руымаш» йӱлам кызытат эртарат. Эше марий сӱаныште тыгай вашлиялтеш. Оръеҥым мӧҥгӧ кондымек, качымарий суртышто чыла йӱлам шуктат. Вара каче ден оръеҥ почеш толшо уна-влак дене кум суртыш, утларакше пошкудо-шамыч дек, киндым вашталташ лектыт. Кум суртыштат омса лондемым вончымо годым ӱдырын кепшылжым руат. Оръеҥ омса лондемыш шогалеш. Йол коклашкыже товар дене руалыт. Иктыже йодеш: «Мом руэт?» Унам пуртышо оза вашешта: «Кепшылжым руэм. Мемнан деке пурен-лектын кошташ корныжо вияш лийже». Тыге кум гана руалыт. Товар дене руалме йӱлам пӧръеҥ шуктышаш. Тудыжо уке гын, эрге йочам шогалтат.
