Виче кундем Малмыж районышто марий, руш, татар, одо-влак келшен илат. Кажне калык шке йӱлаже, мурыжо, куштымашыж дене поян. Марий-шамыч ты шотышто ончылно улыт. Кугу Кетек ялысе тӱвыра пӧртыштӧ «Шонанпыл» йоча куштышо ансамбль пашам ышта. Ӱдыр-рвезе-влак дене финн-угор калык-шамычын икшывыштын тӱнямбал лагерьыштышт палыме лийынна. Нуно тушко вуйлатышышт И.А.Кошкина дене пырля толыныт ыле.
– Кочана-кована, ачана-авана-влак марла куштеныт да кызытат куштат. Ме нунын корныштым тошкена. Марий йӱла, тӱвыра нерген шукырак пален налаш кумыл уло. Ме шке кундемысе куштымаш-влакым шинчам кумен ончыктен кертына. Тыгак Шернур вел калык, эрвелмарий-шамыч семын куштена. Эсогыл Морко сӱаным ныл мужыр дене ончыктенна, – ойлат ӱдыр-рвезе-влак.
Мастарлыкыштым тӱрлӧ конкурсышто ончыктат. «Вятские выкрутасы» регион-влак кокласе конкурсышто сеҥышыш лектыныт. «Вешние воды» областной фестиваль-конкурсышто кокымшо лийыныт. Тӱрлӧ мероприятийым, форумым почмаште усталыкышт дене куандареныт.
– Марий муро чоннам вӱчка, капкылым лывыргын тарватымым нимо дене от таҥастаре. Марий куштымаш моткоч сылне да ойыртемалтше, – ойлат ансамбльын участникше-шамыч.
