Морко район Волаксола школ уста, кумдан палыме поэт-новатор Валентин Колумбын лӱмжым нумалеш. Тушто тудын гаяк марий шӱлышан, сылнымутлан шӱман, чолга 75 ӱдыр-рвезе тунемеш. Нунылан латкуд туныктышо келге шинчымашым пуа. Йочасадыш коло икшыве коштеш. Кодшо кугарнян нунын деке унала миенна да лишкырак палыме лийынна.
Йоча-шамыч дене актовый залеш чумырген, «Ямде лий», «Кугарня» да «Морко мланде» газет-влакын памаш вӱдла шолшо илышышт дене палдаренна, изирак викториным эртаренна. Ӱдыр-рвезе-шамычат чолгалыкыштым ончыктеныт. С.Г.Чавайнын почеламутшым, кружок дене тӱшкан возымо пашам сылнын лудыныт.
Волаксола школышто йоча газетым 21 еҥ налеш. Подписчик-влакын чотышт ий гыч ийыш кугемме чоным ырыкта. Тиде «Шонанпыл» кружокын паша лектышыже, очыни. Тудым марий йылмым да литературым туныктышо Р.З.Никитина вӱда. Ӱдыр-рвезе-влакын марий сылнымутлан шӱман улмышт «По-эзий» секцийыште утыр палдырнен. Нуно почеламутым чын возаш тунемыныт, корнылам пырля лончыленыт, тӱрлӧ рифмым, сылнештарыме йӧным кычалыныт. 7-ше классыште тунемше Дима Андреев поснак ойыртемалтын (снимкыште – шола гыч визымше).
«Журналистике» секци-йыште журналистикын тӱрлӧ жанрже дене палыме лийыныт, интервьюм налаш тунемыныт. Изирак класслаште тунемше-шамыч тӱрлӧ модыш дене модыныт. Мероприятий деч вара Анатолий Фёдоров ден Надежда Иванова школ тоштерыште оҥай экскурсийым эртареныт. Марий школышто В.Колумбын усталык шӱлышыжӧ курымла дене илаш тӱҥалеш манын ӱшанена.
