Ме, «Кугарня» ден «Ямде лий» газет редакций-влакын пашаеҥышт, яллашке да школлашке чӱчкыдын лектын коштына. Калык дене вашлийын, пашана дене палдарена. Кодшо арнян мемнам Шернур районысо Мустай школ шокшын вашлийын (снимкыште). Ӱмаште олмыктымо школышто 50 ӱдыр-рвезе тунемеш.
Мыланна руш йылмым да литературым туныктышо Л.И.Медведева ден директорын воспитаний паша шотышто алмаштышыже А.А.Паймаков экскурсийым эртареныт. Сылнын сӧрастарыме класслам, поян тоштерым ончал савырненна.
Школын марий шӱлышан улмыжо моткоч куандарен. Йоча-влакын усталык койышыштым коридорысо пырдыжыште кечыше мотор сӱретла да шке ыштыме паша-шамыч гоч шижынна. Вара, актовый залыште погынен, газет редакций-влакын пашашт дене палдаренна. «Ямде лий» газетым кӧ налеш?» манын йодмылан шукын «Мый!» манын кычкыралыныт. Чолган возкалыше-шамычлан изирак пӧлекым кучыктенна. Тыгак йоча-влак оҥай да шонкалаш таратыше йодыш-шамычлан вашмутым кычалыныт. Нунылан тӱрлӧ модыш дене модашат пеш келшен.
Тунемше-влак В.Крыловын «Йогыландий» пьесыж гыч ужашым мастарын модын ончыктеныт. Сценыште шкеныштым лӱддымын, чолган кучымышт, марла яндарын, лывыргын мутланымышт дене чоннам савыреныт. «Рвезылык» ансамбльыш коштшо ӱдыр-рвезе-влакын сылне сем почеш кушталтен колтымышт пайрем шӱлышым пуртен. Нуным икмыняр ий гыч кугу сценыште ужмо шуэш.
Авторын фотожо.
