Йот йылме дене возышо поэт-влакын сылнымутыштым марий серызе-влак эре кусареныт. Кусарыме произведений-влак посна книга дене пытартыш жапыште шукырак лекташ тӱҥалыныт. Теве О.Ипай лӱмеш молодёжный Кугыжаныш премийын лауреатше, марий поэтессе А.П.Иванова шукерте огыл савыкталтше, Андрус Кивирахкын «Куд шкетой окса шумлык» («Шесть монологов о деньгах») да Арво Валтонын «Пагыт модыш» («Игры времени») – книгаштым кусарен.
– Кусарыме дене вес калыкын илышышыже, йӱлаже дене лудшым палдарена, – ойлен Альбертина Петровна Республикысе йоча да самырык-влаклан В.Х.Колумб лӱмеш книгагудышто эртаралтше презентаций годым. – Эстон поэт-влакын возымыштым кусарымем годым, родо-тукым калык дене шкежат лишкырак палыме лийым. Нуно произведенийыштышт шке калыкыштым койдарчык гоч ончыктат. Айдемын пӱрымашыжым сылнымут полшымо дене почын пуат. Кусарыме годым мый тыгак тунемам: айдемым аклаш, шке чоным, шонымашым почын пуаш.
Финн, эстон, венгр да моло родына-влакын произведенийлаштым лудын, сылнымутым аклыше еҥ шкаланже шуко уым пален налеш. Марий кугыжаныш университетын икымше курсышто тунемше ӱдыр-рвезе-влак поэтессын кусарыме ойлымашыже-влаклан тыгай акым пуэныт: «Книга нелын лудалтеш гынат, моткоч оҥай, шонаш таратыше», – ойленыт студент-влак.
Альбертина Петровнан «Айдеме нигунам ик верыште шогышаш огыл, тудо кажне кечын кушшаш, тунемшаш да шуко лудшаш. Тидын годым эн кӱлешанжым ушыш шыҥдарышаш» манын каласымыже мыйын вел огыл, вашлиймашыш мийыше кажне самырыкын ушешыже шарналт кодын, шонем.
