Озаҥыште – «Марий шонанпыл»

Озаҥ оласе марий-влакын национально-культурный автономийыште кушкын толшо тукымым вияҥдымылан кугу тӱткышым ойырат. Марий ача-аван икшывышт Шорыкйол пайремышке, Марий тиште, Марий талешке кечылашке, калык кидпаша дене мастер-класслашке кумылын ушнат. Нуно Рушарня школыш куанен коштыт. Кажне арнян ӱдыр-рвезе-шамыч марий йылме, сылнымут, марий калыкын тӱвыраже да эртыме корныж нерген келге шинчымашым налыт.

Йоча-влакым ончыко вӱдаш, нунылан у корным почаш манын, проектым возат. Ик эн ойыртемалтшыже «Марийская радуга» этнокультурный йоча фестиваль. Тудын авторжо-шамыч Н.В.Кукушкина ден А.С.Малова улыт. Эн ондак республикысе сымыктыш конкурсым эртареныт. Вич таҥас лийын: семӱзгар дене шоктен мурен-куштымаш, шкетын, дуэт, хор дене мурымаш, куштымаш, сылнымут. Таҥасымашке Татарстан Республикысе Агрыз, Актаныш, Арск, Кукмара, Мамадыш, Лаишевский районла, Озаҥ ола гыч ятыр паша пурен.

2 декабрьыште Татарстан Республикысе калык-влакын келшымаш пӧртыштышт гала-концерт лийын. Тушто сеҥыше-шамычым саламленыт. «Хореографий» таҥасыште Актаныш район гыч «Ший памаш» калык фольклор ансамбль Гран-прим сеҥен налын. Дуэт дене мурымаште Уял гыч Ангелина ден Максим Ирбулдинмыт ойыртемалтыныт. Семӱзгар дене шоктен мурен-куштымаште Агрыз район Буймо села гыч «Эр ӱжара» калык фольклор ансамбль икымше верыш лектын. Озаҥ ола гыч Арина Ибатиева почеламутым эн сылнын лудын. Сеҥыше-влакым снимкыште ужыда.

Проект радамыште йоча-влаклан мастер-класслам эртареныт. Туныктышо-шамыч, тӱрлӧ йӧным кучылтын, нунын усталыкыштым ончыкыжымат вияҥдаш шонат.

  • Христина Александрова

    «Ямде лий» газетын редакторжо.

    Related Posts

    Икымше таҥасымаш

    29 октябрьыште Советский районысо Роҥго кыдалаш школышто дроным виктарыме дене «Пилоты будущего» чемпионатын регионысо йыжыҥже эртаралтын. Тудым «Движение Первых» толкын «Молодёжь и дети» нацпроект почеш эртарен. Таҥасымашке 48 ӱдыр-рвезе ушнен.…

    Усталыкнам тергенна

    Октябрь кыдалне У Торъял посёлкысо тӱвыра рӱдерыште «Финн-угор тӱня» районысо фестиваль-конкурс нылымше гана эртаралтын. Тушко У Торъял, Тошто Торъял, Элембай, Немда да Д.И.Онар лӱмеш Токтарсола школла гыч чолга ӱдыр-рвезе-влак ушненыт.…