Звенигово район Чакмарий школын тунемшыже-влак Дарья Иванова ден Андрей Харченко дене республикысе олимпиадыште палыме лийна. Нуно коктынат ИКН предмет дене уш-акылыштым тергышт. Кызытсе самырык тукымын марий калыкын тӱвыраже, пайремже-влак нерген шонымашыштым пален налаш манын, когыньышт дечат йодым.
– Ме марий улмына дене моткоч кугешнена. Ешыштына марий пайремым жаплена. Пеледыш пайремышке куанен коштына. А тушто марий мурым колыштын, марий куштымашым ончен шерна огеш тем. Марий вургемым чийыше ӱдыр-рвезе-влак кузе моторын койыт! Икте-весышт дене кутырен колтымышт йоргыктен йогышо памаш вӱдым ушештара. Марий ялыште илаш могай пиал! – чоным почын каласышт Даша ден Андрей.
Тыгодым шочмо верым йӧратымыштат утыр шижалте. Нуно шочмо кундемысе ойыртемалтше верла, кумдан палыме еҥ-влак нерген шымлыме пашам, проектым возат. Конкурслашке ушнат.
– Уста еҥ-влакым Провой кундемын шӧртньӧ падырашыже-шамычлан шотлена. Тиде серызе Александр Мичурин-Азмекей, сӱретче Георгий Тайгильдин, икымше марий семмастар Иван Ключников-Палантай, спортсменке Татьяна Белкина да ятыр молат. Нуно марий калыкын ончыкылыкшо верч чот тыршеныт да тыршат. Мемнан тукымат тыгай лийшаш. Садлан ме, проектым возен, йолташна-влаклан палдарынена, – ойлат чолга ӱдыр ден рвезе.
Андрей тӱрлӧ компьютер программым мастарын кучылт мошта. Шочмо кундемжым, марий тӱвырам интернетыште чапландарынеже. Тек тыгай ӱдыр-рвезе-влак шукынрак лийыт.
Палемдыман, Андрей республикысе олимпиадыште 9-ше классыште тунемше-влак коклаште икымше верым сеҥен налын.
