Йошкар-Оласе Йоча экологий да биологий рӱдер пелен «Лесная тропа» интерактивный тунемме рӱдерым почыныт. Тыгай тунемме верым келыштараш манын, «Охрана леса» автономный коммерческий огыл организаций Марий Эл Республикысе пӱртӱс министерствын полшымыж дене проектым возен. Ты проект Президент грантын фондшын эртарыме конкурсышто сеҥышыш лектын.
Пректын тӱҥ шонымашыже – школ лесничестве-влаклан полышым пуымаш. Чодыра йолгорнышто 5 тӱрлӧ станций уло: «Охрана леса», «Защита леса», «Лесная таксация», «Лесная наука», «Лесовосстановление». Чодыра сферыште пашам ыштыше партнёр-специалист-влак станцийлам ямдылаш полшеныт. Ончыкыжым нуно тунемше-влаклан уроклам эртараш тӱҥалыт. Очный да дистанционный экскурсий-влак лийыт.
«Лесная тропа» проектлан кӧра республикысе кажне районышто да олалаште школ лесничестве-влак пашам ышташ тӱҥалыныт. Тушко 72 школ гыч 858 тунемше ушнен.
Л.ГРИГОРЬЕВА ямдылен.
