15 апрельыште Марий Эл Республикысе Писатель ушем МАССР-ын калык серызыже К.К.Васинын шочмыжлан 100 ий темме лӱмеш «Сылнымут алмаштыш» регион-влак кокласе конкурсым эртарен. Ты конкурс самырык автор-шамычым латнылымше гана иквереш чумырен. Марий Элысе школла, лицейла да гимназийла, тыгак Башкортостан Республик гыч тунемше-шамыч деч руш да марий йылмыла дене 150 наре паша пурен.
Мероприятийыш 70 наре участник толын Самырык автор-влаклан дипломым да книгам кучыктеныт. Нуным Марий Эл Республикысе Тӱвыра, печать да калык-влакын пашашт шотышто министерствын тӱҥ специалистше В.Э.Комаров саламлен. Туныктышо ден воспитатель-шамычымат чапкагаз дене палемденыт.
– Писатель ушем тыгай конкурслам умбакыжат эртараш тӱҥалеш. Вет тудын пайдаже пеш кугу. Йоча-влакын тыршымышт шижалтеш. Ӱшаныме шуэш, вес гана марла возымо паша-влак утларак лийыт. Ты конкурсыш пурышо паша-шамыч кокла гыч эн ойыртемалтшышт «Эрвий» ден «Дружба» альманахлаште да «Кече-Солнышко» журналыште савыкталтыт, – ойла Россий писатель ушемын Марий Элысе пӧлкажым вуйлатыше С.Д.Архипова.
