«Школьник-влакын российысе толкынышт» (РДШ) йоча да самырык-влакын мер-кугыжаныш организацийыштым 2015 ий 29 октябрьыште Россий Президент В.В.Путинын кӱштымыж почеш чумырымо. Ты толкынын Марий Элысе пӧлкаже шке шочмо кечыжлан 2016 ий 19 апрельым шотла. Тудым Йошкар-Оласе 29-ше номеран школын директоржо А.И.Кузнецов вуйлата. Марий Эл Республикысе 185 тунемме тӧнеж Школьник-влакын российысе толкыныштын программыжым илышыш шыҥдарен толеш.
Республикысе пӧлкан пашаж нерген координатор Л.В.ЛОСКУТОВА дене вашлийын мутланышна.
– РДШ-ын программыже личность семын вияҥме, гражданский чолгалык, военный да патриотизм, увер да медийный направленийла гыч шога. Но кажныже эше тӱрлӧ йыжыҥым уша. Мутлан, тунемше спорт дене кылым кучынеже – чыла йӧн уло. Пӱртӱсын йолташыже лийнеже – нигӧ чаракым ок ыште. Икманаш, ты толкыныш ушнышо кажне йоча шкалан келшыше пашам муын кертеш.
– Лариса Вячеславовна, РДШ радамышке ушнышо йоча-влак гына конкурслаште, мероприятийлаште усталыкыштым терген кертыт мо?
– Кушто илымым, могай школышто тунеммым ончыде, кажне тунемшын ушнаш йӧнжӧ уло. Тидлан кумыл гына лийже. Тӱҥ йодмаш: йоча 8 ияш лийшаш да ача але ава дене пырля РДШ-ын сайтыштыже регистрироватлалтшаш.
– Палаш оҥай, республикыште мыняр икшыве ты толкынын еҥжылан шотлалтеш?
– РДШ радамыш йоча, туныктышо, ача-ава-влак ушнат. Кызытеш вич тӱжем утла еҥ регистрацийым эртен. «ВКонтакте» соцкылысе «РДШ/Республика Марий Эл» тӱшкаштат тынарак еҥым авалтыме. Но палемдыман: толкынын эртарыме конкурслаш 30 тӱжем утла икшыве ача-ава, туныктышо-влак дене пырля ушна. Кугыеҥ-влак, толкынын радамыштыже лийын, «Корпоративный университетыште» ешартыш шинчымашым, методике полышым налын кертыт. Чолга ача-ава-влак «Родительское крыло РДШ» сообществым чумыреныт. Школым тунем пытарыше-влакын «Крыло выпускников» тӱшкашт уло.
– Республикысе могай школышто але районышто увер да медийный направленийлан поснак тӱткышым ойырат?
– Тиде пашам кажне районышто, олаште шуктат. У ий деч ончыч эртарыме «Медиа-хакатон» фестивальыш 100 йочам чумыренна. Нуно возымо да войзымо пашам чын ыштыме нерген шинчымашым налыныт. Марий Турек район Мариец, Курыкмарий район Эмінсола, 6-шо номеран Морко, Медведево район Руэм, Руш Кукмарий, Кужэҥер район Руш Шой школ-влакын, Коркатово (Морко район), Звенигово лицей-влакын да Йошкар-Оласе икмыняр школын поснак чолга улмыштым ойырен каласаш лиеш.
– 2021 ийым иктешлен, РДШ-ын Марий Элысе пӧлкашкыже ушнышо йоча-влакын эн кугу се-ҥымашышт дене палдарыза.
– Эн кугу сеҥымаш – РДШ ешнан кажне ийын кушмыжо. Кажне конкурс – тиде у шинчымаш, йолташ, йӧн да ончыкылыклан ӱшан. Йошкар-Оласе Бауман лицейын командыже «Киберлига» спорт таҥасымаште Российыште 2-шо верым сеҥен налын. Советский район Кужмарий школ гыч Настя Орехова Всероссийский спорт фестивальыште иктаҥашыже-влак коклаште кокымшо лийын. «Лига вожатых» всероссийский конкурсын ик таҥасыштыже Йошкар-Оласе 10-шо номеран школын вожатыйже Саша Сошина сеҥышыш лектын. РДШ – тиде вий, усталык шӱлыш да сеҥымаш!
