Самырык тукым дене вашлиймаш кажне гана куаным пӧлекла. Кодшо арнян Марий книга савыктышын, «Ончыко», «Кече-Солнышко» журнал-влакын, «Марийская правда», «Марий Эл», «Ямде лий» газет-шамычын пашаеҥышт Волжский район Шарача школышто тунемше-влак дене мероприятийым эртарышна. Актовый зал тич погынышо йоча-шамыч кокла гыч «Ямде лий» газетым налше да лудшо-влак шагларак лийыч гынат, ончыкыжым кыл эшеат пеҥгыдемеш да подписчик-шамыч ешаралтыт манын, ӱшаным огына йомдаре.
«Шырча» калык фольклор ансамбльын сылне муро ден куштымаш пӧлекше паша кумылнам эшеат ылыжтыш.
Мастер-классым Российын сулло, Марий Элын калык сӱретчыже И.Ямбердов, газет ден журнал-влакын пашаеҥышт эртарышна. 5-6-шо класслаште тунемше-шамыч дене пырля «Ямде лий» газетын икмыняр номержым шергална. Заметкым возымо шотышто кутырышна. Мут-влаклан рифмым тӱшкан кычалын, почеламутымат возышна. Икшыве-шамыч шке коклаштышт рушла кутырат гынат, марий мутым кычалме модышыш чолган ушнышт. Марий йылмым да литературым туныктышо Т.Н.Николаеват йоча-влакын мут саскаштым келыштараш полшыш. Поэзийым йӧратыше-шамыч Ксения Андреева (5-ше «Б» кл.), Даша Кузьмина (5-ше «Б» кл.), Матвей Давыдов (6-шо кл.) почеламутым марла сылнын лудмышт дене куандарышт.
Паша кечынам Шарача школын коллективше дене волейболла модмаш мучашлыш. Поро йолташна-влаклан тауштена да келшымаш кылна огеш лушко, шонена. «Ямде лий» йоча газет – республикыште икте веле. Икшыве-влак тудым палышаш улыт.
З.ТИМОФЕЕВА.
М.СКОБЕЛЕВЫН фотожо.
