Ача – ешын негызше. Тудо лӱддымӧ, виян, мунло, чын верч шогышо. Тыгодым поро шинчаончалтышан, икшыве, пелаш верч тургыжланыше. Ешыште ачан пеҥгыде вачыжым шижше, пайдале ой-каҥашым пуымыжым кажне кечын колшо еҥ эн пиалан. Нине шомак-влак Марий Турек посёлко гыч шуко шочшан ача А.Г.Шуталевлан тӱрыснек келшен толыт. Тудо пелашыже Светлана Александровна дене шым ӱдыр-рвезым ончен куштат. ™маште «Идалыкын ешыже» республикысе конкурсышто «Шуко шочшан еш» таҥасыште сеҥышыш лектыныт. Тений Россий Президент В.В.Путинын пунчалже почеш Шуталевмытым «Родительская слава» орденын медальже дене палемденыт.
– Кажне айдемын Шочмо элже уло. Тыште ме шочына, вийым, уш-акылым погена, шуаралтына. Ешым чумырымеке, икшыван лиймеке, чон ласкалыкым, аралтышым, эҥертышым шижына. Ме коктынат шуко шочшан ешыште шочын-кушкынна. Шым икшыван лийына манын, нигунам шонен огынал. Юмо мыланна кугу пӧлекым ыштен. Тидлан кажне кечын тауштен да йывыртен илена, – ойлат ача-ава.
Кажнын – шке сомылжо
Йоча-влак чонлан келшыше пашаштышт ончылно улыт, сеҥымашышт ятыр. Кажныжын грамот ден дипломжым, кубок ден медальжым иквереш чумырет гын, пӧртысӧ пырдыж темеш.
Эн кугу эргышт – латшым ияш Дима. Йошкар-Оласе технологий колледжыште тунемеш. Тыгодым ужалымаш дене менеджерлан пашам ышта. Изинек спортлан шӱман кушкеш. Самбо, дзюдо, панкратион, рукопашный бой дене пеҥгыде кылым куча.
Костя шольыжо Дима гаяк пеҥгыде капкылан. Тудо Марий Турек посёлкысо школышто визымше кадет классым тунем пытарен. Яра жапыште сӱретлаш, лего да картон гыч машинам, корабльым, вертолётым, пӧртым погаш йӧрата. Усталыкшым А.С.Волковын вуйлатыме «Авиамоделирование» кружокышто вияҥда. Ты аланыште кугу кӱкшытыш шунеже.
Индеш ияш Дарина ден шым ияш Мария кушташ кумылан улыт. Каныш кечылаште Марий Турек посёлкысо ешартыш шинчымашым пуышо рӱдер пеленысе студийыште мастарлыкыштым вияҥдат. Дарина Костя изаж семынак сӱретлаш, бисер гыч тӱрлӧ арверым ышташ, алмаз тӱрым «тӱрлаш» йӧрата, фортепиано дене шокта.
Коля вич ияш веле гынат, могай гына машинам огеш пале?! Тудын коллекцийже пеш поян. Лего гыч шкежат ойыртемалтше транспортым пога. Тидлан кок ияш Игорь шольыжымат кумылаҥден. Вич тылзе ончыч Серафима шӱжарышт ош тӱням ужын. Изи шӧртньӧ падырашым чыланат ончаш полшат.
Ик шонымаш дене
– Ешыште кажнын шке сомылжо уло. Изинек пашалан шӱмаҥдена. Чодырашке емыж-саскам погаш тӱшкан коштына. Вара ужалена. Тыге оксан акшым шижаш туныктена. Пакчасаскам ятыр шындена. Ӱдыр-рвезе-влак шӱкшудым сомылаш, вӱдым шаваш полшат. Пиццым, кексым, тӱрлӧ когыльым пырля кӱэштына. Ӱстелым моторын погаш тунемына, – ойла Светлана Александровна.
Шуталевмыт ешыште ик минутшат яра ок эрте, манаш лиеш. Кечывалым пӱртӱс лоҥгашке лектын коштыт, куржталыт, телым ече дене мунчалтат. Кастене шахмат, шашке, домино, лото дене модыт, пазлым погат. Икте-весыштым ончен вияҥыт.
– Девизна тыге йоҥга: «Мемнан ешна – мемнан Российна». Ешым элын изи ужашыжлан шотлена. Ме ушан, уста, поро кумылан икшывым куштена гын, шочмо кундемнан ончыкылыкшо, пӱрымашыже волгыдо лийыт. Ешыштына «мый» шомак уке. Ме ик шонымаш дене илена. Куаным, ойгым лош пайлена. Нелылык деч лӱдде, кугу ӱшан дене ончыко ошкылына, – ойлат Светлана Александровна ден Александр Геннадьевич.
