Марий тиште кечын Йошкар-Оласе Мер да политике рӱдер кугыеҥ-влакын гӱжлымышт да йоча-влакын юарлыме йӱкышт дене темын.
– Ке-кы-рек-кре-ек! – торашке йоҥгалтын. Мо тыгай? Кушто? «Модыш алан» площадкыш Агытан (Марий Эл Республикын калык артисткыже Эльвира Лисицына) толын. Тӱрлӧ районысо школла гыч ушнышо ӱдыр-рвезе-влак тудым куанен вашлийыныт. Агытанже тыглай огыл: муренат, куштенат, модыктенат мошта, йӱкшӧ могай! Эше марла кутыра! Оҥай! Йоча-влак модыш полшымо дене марий вургем дене палыме лийыныт. Оксина кокайын (Марий тӱвыра рӱдерын пӧлка вуйлатышыже Людмила Кошкина) мунло шомакше-влак кажне икшывым сымыстареныт. Модыш йӧре марий йылмым писын тунемаш, шуко у шомакым шарнен кодаш лиеш улмаш! Йошкар-Оласе 2-шо номеран да Медведево районысо Руш Кукмарий школласе тунемше-влак марий калыкмутым, туштым палымыштым, марий йомакым возен, писын шонен моштымо мастарлыкыштым «Ямде лий» газетын эртарыме «Уштодыш-модыш» площадкыште тергеныт. Йӧратыме, арня еда вучымо «Ямде лий» газетыштлан могай гына пале мутым муын огытыл! Йоча-влак марий йылмынан сылне шомаклан поян улмыжым раш шижыныт!
