«Йоча-влаклан мыняр ий марте урокым ышташ полшыман?» йодышлан психолог, психологий шанче кандидат, доцент Т.Н.ГОЛОВАНОВА (снимкыште) вашмутым пуа:
– Икшывышт сай отметкым налышт манын, ача-ава-влак чыла ышташ ямде улыт. Южышт йочашт олмеш урокым ыштат. Тыге икшыве тыршымым да шонымым чарна, кугыеҥлан ӱшанаш да ямдым вучаш тӱҥалеш. Ача-аван сомылышт – полшаш, умылыдымо йодышым рашемдаш.
Шарныза, йочам шкевуя пашам ышташ туныктыман. Ойлыман: «Паша гыч толмешкына, урокетым черновикеш ыште». Икшыве кечывалым мом ыштен моштен огыл, кастене умылтараш лиеш.
Йоча пагытемым шарналташ гын, авам 4-ше класс марте мӧҥгысӧ пашам ышташ полшен. Мыланем математике предмет нелырак лийын, да авам уда отметкым нала тӱҥалам манын лӱдын. Но мӧҥгысӧ пашам олмешем нигунам ыштен огыл. 5-ше класс гыч уроклан шке ямдылалтынам.
Икшыве-влак тӱрлӧ лийыт. Кӧ гын 1-ше класс гычак шке ышта, кӧлан гын 7-ше класс марте полшыман.
Х.АЛЕКСАНДРОВА мутланен.
