Марий Элыште да финн-угор тӱняште В.А.Пектеевын лӱмжӧ кумдан палыме. Василий Александрович Морко район Уилем ялеш шочын. Чолга рвезе изинек мураш-кушташ йӧратен. Октябрьский школышто тунеммыж годымак клубышто шындыме концертлаште ончаш толшо калыкым куандарен, спектакльлаштат модын. Н.К.Крупская лӱмеш Марий кугыжаныш педагогический институтым тунемын лекмек, Ленинградысе театр, музык да кинематографий институтын режиссёрский факультетыштыже шинчымашым поген.
В.Пектеев – Марий Эл Республикысе сымыктышын сулло деятельже, М.Шкетан лӱмеш Марий кугыжаныш драме театрын художественный вуйлатышыже. Тудо 50 утла спектакльым шынден. Нунын коклаште – «Салика» (С.Николаев), «Оръеҥ мелна» (А.Волков), «Морко сем» (М.Рыбаков) да молат. Шкежат шуко рольым модын.
Усталыкше тӱрлӧ шӧрыныштӧ палдырна. Финн-угор тӱнясе театр-влак дене пеҥгыде кылым ыштен. «Майатул» фестивальым эртарымашке кугу вий-куатым пыштен. Поэзий аланысе мутсаскажат ойыртемалтше да келге шонымашан. «Авалта пиал тӱням», «Чонем», «Канде ӱжара» да моло почеламутшылан муро-влак возалтыныт.
23 январьыште Василий Александрович 70 ийым темен. Чапле лӱмгечылан пӧлеклалтше кугу фестиваль М.Шкетан лӱмеш Марий кугыжаныш драме театрыште февраль гыч тӱҥалын апрель марте эртаралтеш. Пытартыш ийлаште шындыме 12 спектакльым ончаш йӧн лиеш. Кугу мероприятий 2 февральыште «Окса тул» спектакль дене тӱҥалеш. Йоча-влакым 11 да 24 февральыште «Золушка» да «Три сестры» йомаклаш пагален ӱжыт. Фестиваль 27 апрельыште «Шӱдыр лоҥго каваште» концерт дене мучашлалтеш.
Василий Александровичым лӱмгечыж дене шокшын саламлена да пеҥгыде тазалыкым, умбакыжат сеҥымашым тыланена.
З.ТИМОФЕЕВА.
Фотом театрын архивше гыч налме.
