Москошто «Россий» форум-ончерыште «Родные-любимые» российысе еш форум эртаралтын. Тушко Российын тӱрлӧ регионжо гыч тӱжем утла еҥ погынен. Участник-влак мастер-класслашке ушненыт, конкурслаште мастарлыкыштым тергеныт.
Кугу мероприятийыште Марий Эл нерген Шернур район Марисола гыч Шабдаровмыт еш палдарен. Илья, Никита, Алексей куштымаш дене тӱрлӧ фестиваль ден конкурсын лауреатышт улыт. Икмыняр ий ончыч тиде еш «Идалыкын ешыже» российысе конкурсышто сеҥен. 2019 ийыште «Родительская слава» орден дене палемдалтын.
Шабдаровмыт «Родные-любимые» еш форумышто «На все руки мастер» да «Семейное шоу талантов» конкурслаште сеҥышыш лектыныт. «Знатоки Родины» конкурсышто Марий Эл нерген оҥайын каласкалымыштлан ончышо-влакын призышт дене палемдалтыныт. Нунын дене кугешнена!
З.ТИМОФЕЕВА ямдылен.
Марий Эл Республикысе Паша да социал аралтыш министерствын фотожо.
