Тыге ойла поэт да журналист Ю.М.Григорьев. Тудо 15 октябрьыште 55 ийым тема. Чапле лӱмгече дене шокшын саламлена. Илышлан куанен, чон ласкалыкым арален, сайлан ӱшанен илаш тыланена.
– Юрий Михайлович, усталык корнет кушеч тӱҥалын?
– Усталык шӱлыш айдемылан шочынак пуалтеш. Мыят эше йӧршын изи икшыве эреак пӱртӱсын ойыртемжым эскерыше, шымлыше кумыл дене моло деч ойыртемалтынам. Усталык йолгорнемже шочмо Тыгыде Морко ялем да Кугу Кожлаял кандашияш школышто тунемме жапем дене кылдалтын. Школышто марий йылмым да литературым туныктышо А.И.Иванов, а вараже Морко районысо «Колхозный правда» газетын ответственный секретарьже, журналист да сылнымутчо Г.М.Бекешев нӧргӧ кумылем поэзийлан поснак шӱмаҥденыт. Райгазетыш юнкор семын возкаленам. Тиде газетак чоныштем усталык сескемым эн ончыч ылыжтен. Марий кугыжаныш университетыште тунеммем годым поэзийым, шочмо йылмын поянлыкшым йӧратыме кумылем кумдаҥын да шарлен.
– Палем, тый студент годыметак «Ямде лий» газетыште ик жап пашам ыштенат?
– 1991 ийыште поэт Василий Крылов дене кылна вияҥын. Тудын вуйлатыме «Мик-мек» мыскара ансамбльыш коштынам. Гитар почеш шкемын мурем йоҥгалтарен, нине мыскараче-влакын концертыштым такше сӧрастарен кертмемлак чучын. Вет калык эре моткоч шокшын вашлийын. Тыге мый тудо ий мучаштак Василий Крыловын вуйлатыме «Ямде лий» газетыште пашам ышташ тӱҥалынам. Паша корнемын тӱҥалтышыжлан тидымак шотлем. Тӱҥ шотышто почеламут-влакым савыкташ ямдыленам, корреспондент семынат ыштенам. Тыгай кугу ӱшаным пуымыштлан ӱмырем мучко кугу таум каласем. Василий Васильевич дечак йоча почеламутым возаш тунемын, мастарлыкемым вияҥденам. Мый илышым йӧраташ «Ямде лий» газетыште тунемынам.
Теве кызыт, «Ямде лий» годсо жапемым шарналтен, йоча поэзиемжымат утларак келгын почын пуаш манын, шуко тӱрлӧ темылан возынем. Тек шарнымашеш кодыт!
– Тый журналистлан ыштенат, мурымат возет, поэт семынат тыршет. Шкендым эн ончыч кӧлан шотлет?
– Мый эн ончыч журналист улам! Жапше годым «Кугарня», «Марий Эл» газетлаште тыршенам, тӱрлӧ семын усталыкемым вияҥденам. А молыжо – чыла кертмем семын. Кызыт уло виемым чумырен, возен шуктыдымо муро, почеламут-влак дене пашам ышташ да калыклан кодаш шонем.
