Ончычшым Владик умыленат огыл: молан тудым йолташыже-влак тыге лӱмденыт? Тудо кугу пальтом чия, воротникшым нӧлталеш, малахай пылышыжым кылден шында: йӱштӧ деч лӱдеш. Владик эрдене шӱргыжым льып-ляп йыгалта да шӱргышовычеш ӱштеш. А вара тый икмыняр кече гыч шӱргӧ ӱштмӧ солыкшым ончал – отат пале: тыгайымак мо Владикын аваже кидышкыже кучыктен?
Ик кечын Владик (очыни, тудо йолташыже-влак деч вожылаш тӱҥалын) ачаж деч йодо:
– Ачий, каласе: Молан мыйым школышто йоча-влак «шоҥго» манын лӱмдылыт?
– Тый шкеже шоналтен отыл, молан нуно тыйым «шоҥго» маныт? Конешне, йолташет-влак йоҥылыш ыштат: тыйым, туныктен каласышаш олмеш, лӱмдылыт гына. Мый гын тыге ом ыште ыле.
А тый палет, кузе шоҥго еҥ шкенжым куча? Эркын ошкылеш. Йӱштӧ дечын лӱдеш. Капкылже начар. Кеҥежымат шокшо вургемым чия. А тый вет шоҥго еҥ отыл.
Владик ачажым ӧрын онча да шке семынже шона: «Чынжымак, мо шот дене мый шоҥго еҥ дене икгай улам? Молан мыйым «шоҥго» маныт?
Ачаже, пуйто эргыжын шонымыжым палыш:
– Тый тале спортсмен, ончыкылык космонавт лийшаш улат, – мане. – Тидлан мом ыштышаш улат, палет?
– Ом пале, – ышталеш Владик. Тудын шинчаштыже чевер кече ончале.
Таче кече деч вара ме тый денет кажне эрдене гимнастикым ышташ тӱҥалына, гимнастике деч вара могырым йӱштӧ вӱд дене нӧртена да вара пушкыдо шӱргӱштыш дене йошкаргымешке йыгена, – мане ачаже.
– Тугеже, ачай, тыят «шоҥго» улат?
– Уке, эргым, мый «шоҥго» омыл. Жап деч ончыч шоҥгемаш огыл манын, спорт да физкультур дене заниматлаш кӱлеш. Вот молан тый денет пырля мыят спорт дене заниматлынем, – шыргыжале Владикын ачаже, Федор Иванович.
Эртыш кок тылзе, идалык. Ынде Владик кажне кечын физкультур да спорт дене заниматла. Лыжный кроссышко коштеш. Кеҥежым эҥерышке йӱштылаш кая. Кажне рушарнян тудым йоча стадионышто ужат. Тушто тӧрштылаш, куржталаш тунемеш.
Владик – ынде школышто пагалыме спортсмен.
Тудын фотографийжат коридорышто, кугу стендыште кеча.
– Вот тыланет «Шоҥго»! – тудын фотографийлам ончен пелештат моло-влак.
