Ӱстел йыр погынен шинчын, тутло сийым тамлен, икте-весылан сай тыланымашым ойлен, кавашке тӱрлӧ тӱс дене волгалтше фейерверкым колтен, кажне ешыште У идалыкым вашлийыныт. Мемнан деке унала поро кумылан, еш пиалым сӧрышӧ Ужар Пу Дракон толын.
Юзо шӱлышан пайремым йоча-шамыч поснак вученыт. Йошкар-Ола гыч Соколовмыт ешыште У ийлан кажне ийын кыртмен ямдылалтыт. Тувраш марте шушо кожым еш дене сылнын сӧрастареныт. Тӱрлӧ тӱсан гирляндым чӱктен, кож йыр шогалын, мурым муреныт, куштеныт, почеламутым каласкаленыт. У ийым чылан пырля вашлиймаш Соколовмытын поро йӱлаштлан шотлалтеш. Икоян еш пыжашыште кушшо йоча-влаклан сеҥымашке шуаш йӧн утларак пуалтеш. Арам огыл Россий Федерацийын Президентше В.В.Путин 2024 ийым Ешын идалыкше семын увертарен.
Соколовмыт ешыште кум чолга эрге кушкеш. Максимлан миф сынан янлык моткоч келша, садлан йочасадысе пайремыште дракон лийын. Дима идалыкын озажым лего гыч погаш шона. А Рома дракон нерген оҥай почеламутым тунемын.
– У ий – эн вучымо пайремна. Йӱштӧ Кугызалан серышым кажне ийын возена. Тудо шонымашнам эре шукта. Дракон мыланна кече еда куаным да пиалым пӧлеклаш тӱҥалеш манын ӱшанена, – ойлат рвезе-влак.
Соколовмыт Йошкар-Олаште илат гынат, марий шӱлышан, йӱлам жаплыше улыт. Вате-марий лу ий утла икте-весым йӧратен, икте-весылан эҥертен илат. Марина Викторовна тӱҥалтыш класслам туныктышылан пашам ыштен, кызыт сурт сомылкам шукта. Константин Юрьевич рӱдоласе ик компанийыште фрезировщиклан тырша.
Кум патыр
Изак-шоляк-влак (снимкыште) иканаште ончалмаште чылт йыгырла чучыт. Кугуракше – Дима – Йошкар-Оласе 31-ше номеран школышто 4-ше классыште тунемеш. Математике предметым поснак йӧрата. Онлайн-олимпиадыште уш-акылжым терга. Йолташыже-влак дене волейболла, футболла талын модеш. Лего гыч тӱрлӧ машинам, танкым погаш кумылан. Аважлан шольыжо-влакым ончаш полша.
Кыдалаш эрге, Максим, 1-ше классыште тунемеш. Дима изаж семынак леголан шӱман. Изи арверла гыч техникым шке гыч шонен луктеш. Шукерте огыл шудым солышо тракторым чумырен. Сылне муро почеш кушташ йӧрата. Пилот лияш шона.
Ныл ияш Рома 43-шо номеран «Жар-птица» йочасадыш коштеш. Ача-аван ойлымышт почеш, кеч-кӧ дене кылым куштылгын ышта. Мыйын мийымем годымат вожылын ыш шого. Тунамак шкеж дене палдарыш, кидыш микрофоным налын, ава нерген почеламутым марла артистла лудо. Тидым видеошто QR-код полшымо дене ончен кертыда. «Сылнымут аршаш» оласе конкурсышто почеламутым сылнын лудмо мастарлыкшым шукерте огыл терген. Камер ончылно шкенжым чолган куча, тӱрлӧ видеом шкеак сниматла. «Мый блогер але полиций пашаеҥ лийнем», – ойла Рома.
Рвезе-влак яра жапышт годым, шке гыч шонен луктын, шкешотан изирак спектакльым ончыктат. Сценарийым возат, рольым шеледат. Тыге ача-аваштын кумылыштым нӧлтат. Марина Викторовна рвезе-влак коклаште шкетын. Тидын шотышто ава тыгерак каласыш: «Тый мемнан принцессына, королевына улат манын, мыйым куандарат. Чылан пагалат да йӧратат. Шкемым эн пиаланлан шижам».
Пайремлен канат
Соколовмыт пӱртӱс коклаште лияш йӧратат. Йӧн лийме семын ялышке коштыт. Ача-авалан сурт сомылкам вораҥдараш, шудым ямдылаш полшат. Марий пайремым пайремлымашым кугезе коча-кова-шамычын йӱлаштым умбакыже шуйымылан веле огыл, тыгак шкешотан канышлан шотлат. Шорыкйоллан васликува, васликугыза лийыт, калыкым куандарат, шкештат веселаҥыт. Ӱярнялан тутло мелнам кӱэштыт, курык гыч мунчалтат, ӱярнякувам йӱлалтат. Пеледыш пайремышке уло еш дене ушнат.
– Марий пайрем-влак йоча-шамычым утларак марий шӱлышаным кушташ полшат. Тылеч посна мӧҥгыштат шочмо йылме дене кутырена. Мыйын шонымаште, еш кугу лийшаш. Ешыште икте-весым умылыман, вашла полышкалыман. Кеч-могай ойгым тӱшкан сеҥаш куштылго, – ойла Марина Викторовна.
