Кужэҥер район Йырмарийын шочшыжо О.Н.Самойлова ден Татарстан кундем Шорамучаш ял гыч А.А.Михайлов 14 ий мужыр йӱксыла вычыматен илат. Мо оҥай: пӱрымаш нуным тора Мурманскыште ваш ыштен. Самырык ӱдыр-каче, жапым шуйкалыде, ешым чумыреныт. Артём Александровичын сарзе пашажлан кӧра еш Мурманскыштак илаш кодын. Кызыт нуным кум икшыве кажне кечын куандара (снимкыште).
Артём Александрович изиж годсек военный лияш шонен. Шонымашыже шукталтын. Ынде 18 ий йӧратыме пашашкыже кумылын вашка. Ольга Николаевна ондак штукатур-малярлан, варажым повар-кондитерлан тунем лектын. Кызыт изирак эргыж дене мӧҥгыштӧ шинча. Яра жап улмо годым пидеш, ӱдыржӧ дене пырля мастарлык-класслаш коштеш, волонтёр пашам шукта.
Йоча – тӱҥ эҥертыш
– Тора кундемысе илышлан тунемаш куштылгыжак лийын огыл. Эн нелыже, очыни, 45 полярный кече да тынарак жап шуйнышо полярный кас лийыныт. Климат Марий Элысе деч ойыртемалтеш. Но йӧратыме еш пелен кеч-куштат ласка, – ойла Ольга Николаевна.
Самырык мужырын эн кугу пиалже да куанже – кок эргышт ден ик ӱдырышт. Ныл ияш Платон, очыни, чоҥышо лиеш. Вет тудо модышлаж дене чоҥаш йӧрата. Эше сӱретлаш кумылан. Миленалан – кандаш ий. Балалайке дене шокта. Верысе художественный студийыш сӱретлаш коштеш, шкенжым куштымаш кружокышто да муро аланыште вияҥда. Кугурак эргышт Владислав 14 ияш. Рвезе моткоч тыматле, шыма, тыгодым пеҥгыде. Ачаж семынак сарзе корным ойыраш шона. Семӱзгарлан шӱман: балалайке да фортепьано дене кудымшо ий шокташ коштеш.
Ешартыш вий
– Йоча-влак мыланна ешартыш вийым пуат. Иктыж дене пырля модман, сӱретлыман, весыжлан мӧҥгысӧ пашам ышташ полшыман, кумшыж дене пырля кидпашам ыштыман. Кажныжлан жапым ойырыман, чон шокшым пуэн моштыман, – ойла Михайловмыт еш.
Кок тӱжем километр утла ӧрдыжтӧ еш пыжашым чоҥышо мужыр кажне ийын шочмо кундемышкыже толаш тырша. Шукыж годым – кеҥежым. Рӱжге пашам ыштат, еш дене канат. Коча-кова-шамыч гын икшывышт ден уныкашт пелен лиймым идалык мучко вучат.
Таҥасымаште – сеҥымаш
Ольга Николаевна ден Артём Александрович кажне яра жапыштым икшывыштлан пӧлеклаш тыршат. Тыгак конкурс ден мероприятийлашкат ушнат. Шукерте огыл «Еш фото» верысе конкурсышто кокымшо верым сеҥен налыныт.
– Тиде конкурс нерген пален налмек, ушнаш вигак кумылаҥна. Кеҥеж канышлан ялыште лийме годым пӱртӱс лоҥгаште фотом ышташ палемдышна. Калык ончыко лач марий тувыр дене фотосӱретым лукташ шонышна. Марий вургемын мотор, ойыртемалтше улмыжым тек молат шижыт, шекланат манын, мутланен келшышна. Ятыр еш фото кокла гыч мемнан пашанам ик эн сайлан шотленыт, марий вургемнам мокталтен ойленыт. Грамот деч посна шарнымашан пӧлекым кучыктеныт, – куанже дене пайлалте Ольга Николаевна.
– Еш пеҥгыде лийже манын, мом ыштыман?
– Ешым чумыраш куштылго, но тудо пеҥгыде, пиалан лийже манын, кажне кечын тыршыман. Ваш-ваш умылен, колын да колыштын моштыман, чӱчкыдынрак поро, ныжыл шомакым чӱчкыдынрак ойлаш тыршыман. Кеч-могай татыштат вашла пеҥгыде эҥертыш лийман, икте-весе деке йӧратымаш ден пагалымашым ончыктен моштыман. Икшывылан пример лийман, – ойлат Михайловмыт.
