Ме, марий-влак, кугезе тукымнан тӱвыражым, йӱлажым шерге поянлык семын перегышаш да аклышаш улына. Кужэҥер район Йӱледӱр школышто тӱҥалтыш класслам туныктышо-влак, тидым шотыш налын, йоча-шамычым марий тӱвыра, йӱла деке изинек шӱмаҥдена. Пырля погынен, тӱрлӧ пайремым эртарена. Аван кечыжлан А.Юзыкайнын «Изий» йомакше почеш инсценировкым тӱшкан модын ончыктенна (снимкыште). Тунемше-шамыч кугезе коча-кова-влакын сурткӧргыштӧ кучылтмо йыравочкышт, пурагоркашт, туйысышт, йолорвашт, марий тӱран солыкышт дене палыме лийынат. Йоча-шамыч сӱан йӱлан ойыртемже нерген уш-акылыштым пойдареныт. Калык мурым муреныт, куштеныт. Пайрем кажнын кумылжым нӧлтен.
З.Н.БИРЮКОВА, Э.И.ЯКИМОВА.
