Ольга Александровна Гордеева ынде латкокымшо ий школышто туныктышылан пашам ышта. Тудо йоча-влакым англичан йылме деке шӱмаҥда. Паша куштылго огыл гынат, школышко кажне кечын уло кумылын вашка. Ольга Александровна кызыт марте Кужэҥер район Йӱледӱр кыдалаш да Йывансола тӱҥ школлаште туныктен. У тунемме ий тӱҥалмеке, йӧратыме пашажым Параньга районысо Матародо кыдалаш школышто шуя. А кодшо ийын тудо «Идалыкын туныктышыжо» районысо конкурсышто 3-шо верым сеҥен налын.
– Конкурслан ямдылалтмаш моткоч шуко жапым налын. Эн ондак шке нерген палдараш кӱлын, варажым ФГОС-ын йодмашыже почеш урокым эртарыме. Пытартыш йыжыҥыште чыла участник Кужэҥер посёлкышто погыненна. Кажныже визитный карточкым ямдылен, методике семинарым да мастер-классым ончыктен. Тыгак кажне конкурслан презентаций кӱлын. Чыла тидым пырля ушен, жюри иктешлымашым ыштен. Тыге мый 3-шо верыш лектынам. Мыланем «Туныктышо» таҥасын дипломжым кучыктеныт. Конкурслан ямдылалтме годым шуко материалже шкемынак лийын, садланак пашам изиш куштылемын. Кугу тау школ администрацийлан да пырля пашам ыштыше йолташем-влаклан, вет нуно эреак пеленем лийыныт, кертмышт семын полшен шогеныт, ой-каҥашым пуэныт, – ойла О.А.Гордеева.
– Ольга Александровна, те англичан йылме дене кылдалтше кружокым вӱдеда. Пашада кузерак эрта? Тушто мом ыштеда?
– Куанен да кугешнен каласем, ончыч пашам ыштыме школыштат, кызытсе паша верыштат йоча-влак англичан йылмым кумылын тунемыт, мӧҥгысӧ пашам жапыштыже ыштат. Йот йылме дене тӱрлӧ конкурсыш ушнат, шке шинчымашыштым олимпиадылаште тергат. А кружокышто ме англичан йылмын кӱлешлыкше нерген ойлена. Англий нерген презентацийым але видеом ончена. Тидын деч посна йот йылме дене мурым йоҥгалтарена, чын кутыраш да лудаш тунемына. ™маште, мутлан, школышто йылме-влакын арняжым эртаренна. Тиде арня кышкарыште англичан йылме дене лудмаш конкурс лийын. Тушко тунемше-влак ятырын ушненыт. Эше ик кугу сеҥымашлан «Рождественские песни» республикысе конкурсышто ойыртемалтмынам шотлем. Ты конкурсышто йоча-влак I степенян диплом дене палемдалтыныт.
– Туныктымо паша тыланда мо дене лишыл?
– Сомыл куштылго огыл гынат, йоча-влак дене пашам ышташ келша. Кажне кечын нуным вашлияш, уш-акылыштым пойдараш, шкалан шуаралташ, паша лектышлан куанаш…
– Тау йодышлан вашмутым пуымыланда. Пашада тӱвыргӧ лектышан лийже.
