Книга могай-гына юзо тӱняшке логалаш огеш полшо?! Икте приключений дене куандара, весе йомакыш ужата але, эртыкым шергалын, тӱрлӧ шымлыме пашалан кумылаҥда. Лудаш веле ит ӧркане. Морко район Купсола школышто тунемше Кристина Николаева книгам лудаш изинек йӧрата. Марий книга-влакым шергалаш утларак жапым ойыра.
– Патриотизм шӱлышан произведений-влак чонеш логалыт. Ик эн йӧратыме произведением – Яныш Ялкайнын «Андрий Толкын» повестьше. Тушто писатель шемер марий калыкын граждан сар жапыште кузе илен лекмыжым почын пуэн. Андрийын шочмо калыкше верч тургыжланымыже, нуным ончыко ӱжмыжӧ куандара, – ойла Кристина. – Кызытсе жапым ончалаш гын, марий эрге-влакын патриотизм шӱлышышт кугешныме кумылым луктеш. Ожнысо семынак калык верч шогат, элым аралат.
Лудмо книга-шамыч, Украин мландыште эртаралтше спецопераций ӱдырым шымлыме пашам возаш кумылаҥденыт. «Элна шке геройжым огеш мондо» шымлыме пашажым Морко район Олыкъялын эргыже Д.А.Крыловлан пӧлеклен. Кристина геройын ача-аваж деке миен коштын, пелашыжын «ВКонтакте» соцкылысе лаштыкшым шергалын. Ты паша дене «Ший талешке» шымлыме паша краеведений конференцийыш ушнен да кокымшо верыш лектын.
