Пӧлемысе кушкыл ден пеледыш-влак айдеме семынак илат: шӱлат, йӱыт, кочкыт, малат, чевер кечылан, яндар южлан куанат. Идалыкын кажне пагытыштыже нуным ончен моштыман. Телым пеледыш дене могай вашталтыш лиеш, да мыланна мом ыштыман? Нине да моло йодышлан вашмутым муаш манын, Российысе ялозанлык рӱдерын Марий Элысе филиалжын вӱдышӧ агрономжо И.А.Рябоконенко дене мутланышна.
– Ирина Анатольевна, пӧлемысе кушкылым йӱштӧ пагытыште кузе ончыман?
– Шыжым да телым кече кӱчыкеммылан кӧра пеледыш айдеме семынак «тургыжлана», эркын кушкеш. Садлан вӱдым шагалрак шавыман, вожышт шӱяш тӱҥалын кертеш. Пӧлемыште утыждене чот шокшылан кӧра юж кукшырак лиеш. Кушкылын лышташ мучашыже нарынчемеш да кошка. Тыгодым вӱдым чӱчкыдынрак шыжыктыман. Пеледышым волгыдырак верышке шындыман. Окнам почман огыл: лышташлаже кылмен кертыт. Телым кушкылын вийжат шагалемеш, садлан ӱяҥдыман.
– Телым пеледышым кусарен шындена гын, эҥгекым ыштена мо?
– Пеледыш телым «нералта», садлан вожоражым уто гана тӱкыман огыл, эмгаташ лиеш. Кушкыл иктаж-мо дене черланен але тудлан шыгыр гын веле кусарыман.
– Йӱштӧ пагытыште, пеледышын укшыжым катен налын, вожым колтыкташ да уэш шындаш лиеш мо?
– Южо кушкылым идалык мучко шындаш лиеш. Но укшлаже телым вожым на-чар да кужу жап колтат. Февраль мучаш марте вучалташ темлем. Лектыш сай лийже манын, стимулятор роста манмым кучылтман.
– Южо кушкылым тичмашнек «малаш» колтыман, маныт.
– Чынжымак, тыгай пеледыш-влак улыт. Мутлан, кала, глоксиния. Теле вашеш вӱдым шагалрак шавыман. Лышташыже лывыжгаш тӱҥалмеке, вургыжым пӱчман. Шоганжым лукман але кӧршӧкге юалге верыш шындыман.
