2-шо номеран Советский школышто тунемше йоча-влак шочмо кундемышт дене кугешнат, келгын шымлат, тӱвыра ден йӱлам пален налаш тыршат. Тиде марий да англичан йылмылам туныктышо Ж.Я.Ялкаеван паша лектышыже. Жанна Яновна кум ий ончыч «Республика Марий Эл и я» кружокым почын. Тушко 5-6-шо класслаште тунемше ӱдыр-рвезе-влак коштыт (снимкыште).
– Кажне йоча шкенжым кугу тӱнян изи ужашыже семын шижшаш. Шочмо кундемым шымлымашке куснымо деч ончыч родо-тукымым радамлена, еш пушеҥгым сӱретлена. Тидым кузе ышташ кӱлмӧ нерген раш умылтарем, – ойла Жанна Яновна.
Кружокышто Марий Элын сӧрал верже-влак нерген мотор видеом, презентацийым ончат. Тора кундемышке лектын кошташ йӧн чылаж годым уке, садлан шочмо районыштым келгынак шымлат. Э.М.Иванов лӱмеш районысо краеведений тоштер дене пеҥгыде кылым кучат. Йоча-влак шымлыме пашашт денат куандарат. Мутлан, Фёдор Таныгин «Деревня Кундушумбал – родина моих предков» проектым возен.
– Икана рвезе соцкылыште Александр Акилбаевын вӱдымӧ «Пешком по республике» передачыште коча-коважын ялжым ужын. Тыге Кундышӱмбалым шымлаш кумылжо лектын. Ялыште шуко уста еҥ шочын-кушкын. Галина Щербакова «Кугезе кумыл» фольклор ансамбльым вуйлата. Та-ныгинмыт еш спортлан шӱман. 2009 ийыште Марий Элыште эн сай спорт еш семын таҥасымаште сеҥышыш лектыныт. Алексей Волков – Марий Элын калык артистше, «Марий кундем» калык семӱзгар оркестрын вуйлатышыже. Тыгак тале туныктышо ден спортсмен-влак ятырын улыт. Ме кажныжым талешкылан шотлена да кугешнена. Кундышӱмбаке турист-влак толаш тӱҥалыт манын, Фёдор моткоч ӱшана, – ойла Жанна Яновна.
Туныктышын да йоча-влакын ончыкылык шонымашышт ятыр. Тек нуно илышыш шыҥдаралтыт да кугу лектышым кондат.
