Тачысе йоча-влак могай жанран книгам лудыт? Йӧратыме произведенийышт могай? Шукерте огыл могай книгам кидышкышт кученыт?
Полина БИРЮКОВА, Национальный президент школ-интернатын тунемшыже:
– Мый фантастике жанран руш произведений-влакым лудаш йӧратем. Марий сылнымут моткоч келша. Никандр Лекайнын «Шӧртньӧ падыраш» повестьшым кок гана лудынам. Пытартыш гана Антон Чеховын «Размазня» ойлымашыжым лончыленам.
Эльмир АНИСИМОВ, У Торъял район Токтарсола школын тунемшыже:
– Мый классикым лудаш йӧратем. Шукерте огыл конкурсышто сеҥымемлан Нина Щербакован «Шӱмет шӱмемым паремда» почеламут сборникшым пӧлекленыт. Книгашке пӱртӱс, шочмо вер, йӧратымаш нерген почеламут-влак пуреныт.
Ксюша ХАРИТОНОВА, Параньга район Усола школын тунемшыже:
– Мый шуко тӱрлӧ книгам лудам. Но фантастике чонемлан лишыл. Мыланем Фред Адран «Лисс Улисс» книгаже келша. Кызыт Жюль Вернын «Дети капитана Гранта» романжым лудам.
