Йоча искусство школысо, книгагудысо, тӱвыра полатысе, школысо кружок-шамыч ӱдыр-рвезе-влакым сымыктыш дек шӱмаҥдат. Теве Башкортостан Республик Нефтекамск оласе Йоча да самырык-влак усталык полатыште илыш шолеш. «Акварель» кружокышто гын сӱретлаш тунемыт (снимкыште). Тудым Л.И.Шуматбаева вуйлата.
– Мый изинек сӱретлаш йӧратем. Школ деч вара рисований дене туныктышылан тунем лектынам. Магистратурышто дизайнер лияш ямдылалтынам. Мыланем вургемым марий тӱр дене сӧрастараш келша. Сӱретлашкемат марий сыным пуртем. Сылнылыкым ужын мошташ ынде йоча-влакым кумылаҥдем, – ойла Любовь Игнатьевна.
Уста туныктышо ӱдыр-рвезе-шамычым акварельым, гуашьым, ӱян пастельым, графический материалым кучылтын сӱретлаш туныкта. Пӱртӱслан, емыж-саскалан, кайыквусылан, янлыклан тӱткышым утларак ойырат. Любовь Игнатьевна йоча-влакым пӱртӱсым, тудын моторлыкшым эскераш тарата. Урок деч ончыч оласе пӱртӱс лоҥгашке лектыт. Кажне пушеҥгын да моло кушкылын могай улмыштым ончат. Шыжым лышташым поген пуртат.
– Урок деч ончыч теме дене кылдалтше тӱрлӧ историйым каласкалем. Южгунам сылне семым чӱктем. Марий сынан сӱретымат сӱретлена. Мастарлыкнам оласе, республикысе конкурслаште ончыктена. Тӱрлӧ чиям кучылтын, шонымашым кагазыш луктын пыштыше да моторлыкым шижын моштышо пиалан, – ойла туныктышо.
