Пеш шукерте ожно ик суртын окнашкыже «Ямде лий» газет чоҥештен толын. Пӧртыштӧ шинчыше-влак лӱдын тӧршталтеныт. Ивук коҥгамбаке кӱзен возын, Анук койко йымаке шылын, Лидуш ӱстел йымаке кудал пурен. Йогор веле нигуш шылын огыл. Тудо кӱжгӧ мыжерым, йолышкыжо кочажын портышкемжым чиен, ачажын упшыжым упшалын, уремышке лектын. Рвезе окнасергаш пижын кечалтше газетым пуртен.
Йоча-влак чыланат Йогор йыр чумыргеныт. Рвезын могай кагаз вӱдылкам пуртымыж нерген пален налаш вашкеныт. Суртышто Йогор гына изиш лудын моштен. Ача-аважат газетым, книгам нигунам кидышкышт кучен огытыл. Ешышт кугу лийын. Кочкаш ситыже манын, Анук ден Ивук индеш ияшак пашам ышташ тӱҥалыныт.
Йогор нарынчаҥше газетым кидышкыже налын да каласен:
– Шольым-шӱжарем-влак, мый школышто тунемаш тӱҥалам. Тендам лудаш туныкташ ты газет полшышаш.
– Изай, мыят тыйын семын лудаш тӱҥалам? – йодын Лидуш.
– Лудаш веле огыл, возашат тунемат, – вашештен Йогор.
Йогор икымше лаштыкым почын да шольо-шӱжарже-влаклан буква-шамычым он-чыктен. Вара мут-влакым слог дене лудаш тӱҥалын. Эн ончыч пӱртӱс нерген возымо почеламутым шергалын, йоча-влакын пашашт дене палдарен, вара туштым туштен.
– Мыланем газет моткоч келшыш! Эрла тыгай газет эше толеш? – кугу ӱшан дене йодын Анук.
– Теве шеҥгелныже возымым ончалына. Арнялан ик гана веле лектеш. Мыланна куд кече вучаш перна, – умылтарен Йогор.
Тиде 1933 ийыште пургыж тылзын икымше кечынже лийын. Чоҥештен толшо газетна тачат кажне суртышко поро йолташ семын тӱкалтен пура да сай деч сай увер-влак дене палдара. Тиде газетым мый веле огыл, йолташем-шамычат, ачам ден авамат куанен лудыт. Мыйын возымемым ужытат, мокталтат. «Ямде лий» сайын тунемаш полша, шочмо йылмынам йӧраташ ӱжеш.
Лена ЕВСЕЕВА.
Волжский, Карай.
