Советский район Ӱшнӱр кыдалаш школыш коштшо 200 йоча тений 1 сентябрьым уэмдыме школышто вашлийын. Тыгай куаным йочасадын кок группысо 30 ньогаже, 30 туныктышо, моло пашаеҥ да ача-ава-влакат шижыныт.
– Школым олмыктымо паша «Модернизация школьных систем образования» программе почеш ышталтын. Чоҥымо паша кечывалымат, йӱдымат шукталтын, – ойла школ директор В.Ф.Галкин. – Пашам жапыштыже мучашленыт. Йоча-влак Шинчымаш кечын волгыдо да уэмдыме школысо парт коклашке шинчыныт.
Школ кудывечыш логалмеке да пеледыш-влакым ужмекак, чон куаныш. А школыш пурышымат, «Мый йӧратем Ӱшнӱр школым» стеле ойыртемалтшыла чучо. Чыла пӧлем волгыдо тӱсым налын. Окналаш ал-ош тӱсан жалюзим пижыктыме, мебельым уэмдыме, ятыр оборудованийым налме. Интерактивный комплекс поснак келшыш. Тушто кок могырым пор, карандаш але фломастер дене возаш келыштарыме доска уло, а покшелныже – телевизор да компьютер семын кучылтмо цифровой панель. Тыгай интерактивный комплексым историй, марий йылме, биологий ден химий да тӱҥалтыш класс кабинетлашке вераҥдыме. Нине кабинетлаштак ксерокс уло. Компьютер классыште йоча-шамыч у компьютер дене пайдаланаш тӱҥалыт. Актовый залымат уэмдыме.
Российысе йоча да самырык-влакын «Движение Первых» толкыныштлан посна пӧлемым ойырымо. А тушко пурымаште кӱварыште кугу фигуран шахмат дене модаш шем-ош клетке-влакым келыштарыме, воктеныжак – вашла шинчен, шашке-шахмат дене модаш йӧнан вер.
Тыгай школышто кажне икшыве куанен тунемшаш. А икымше гана парт коклашке шичше 15 икшывылан – чапле пӧлек да пиал.
Э.ТЕРЕНТЬЕВА.
