Редакцийышке Екатерина Н. (Звенигово район) деч йодыш пурен: «Эргымым изи улмыж годым пий пурлын. Шкеже ныл йолан йолташым огына ашне. Кызыт 10 ияш гынат, моткоч лӱдеш. Пийым ужмеке чытыраш тӱҥалеш. Кузе лыпландараш лиеш?»
Калыклан психологий ден педагогике да социал полышым пуышо «Доверие» республикысе рӱдерын психолог-педагогшо Т.СОЛОВЬЁВА икмыняр ой-каҥашым пуа:
– Лӱдмаш иканаште огеш мондалт. Тиде йодышым вигак рашемдаш ида вашке. Йочан пий дек лишемаш кумылжо уке гын, виеш ида ыштыкте. Пий-влак нерген шукырак каласкалыза, поро ойлымашым пырля лудса, кином ончыза. Йӧн уло гын, ончерыш миен толза. Тушто шкем кучен моштышо, ушан пий-влак улыт. Йочан кӧргӧ чон дене ямде улмыжым шижмеке, изи пинегым налаш темлыза. Келша гын, налза. Икшыве пинеге дене модаш, тудым пукшаш тӱҥалеш. Тыге йоча лӱдмым эркын-эркын чарна.
Уремысе пий дене шкем кузе кучаш?
- Ида курж.
- Шинчашкыже ида ончо.
- Пий дек туп дене ида савырне.
- Лап ида лий.
- Ида кычкыре.
- Кидым ида лупшо.
