Лӱмлӧ марий поэт В.Колумбын сылнымутшо виян, шонаш таратыше, чонеш логалше корныла дене ойыртемалтеш. Тудын усталыкшым аклыше, йӧратыше еҥ-влак «Колумб лудмаш» пайремышке кажне ийын погынат. Регион-влак кокласе сылнымут конкурс-фестиваль тений онлайн эртаралтын. Тудо 37-ше гана лийын. Таҥасымашке тӱрлӧ ийготан шӱдӧ утла еҥ ушнен. Нуно Колумбын почеламутшым рушла да марла лудыныт. Почеламутым шке гыч возышо-влак коклаште таҥасымаш лийын. Мурсемлан шўман-влакым посна акленыт.
Почеламутым лудмо дене 7 ияш марте сеҥыше-влак:
Элави Аппакова ден Татьяна Табуева (21-ше номеран Семёновка йочасад), Ирина Николаева (2-шо номеран Морко йочасад) – марла; Мадина Филиппова (7-ше номеран Морко йочасад) – рушла.
8-10 ияш-влак коклаште сеҥыше-влак:
Даниил Романов (Волжский, Карай), Екатерина Петрова (Морко, Волаксола) – марла; София Романова (Марий Турек, Сысоево) – рушла.
11-14 ияш-влак коклаште се‰ыше-влак:
Яна Ямбаршева (Шернур, Койсола) – шке возымо почеламутшо дене; Арина Фоминцева (Свердловск кундем) – рушла.
15-18 ияш-влак коклаште сеҥыше-влак:
Анастасия Иванова (Медведево гимназий) – марла; Анна Серебрякова (Курыкмарий район) – шке возымо почеламутшо дене; Алина Дмитриева (21-ше номеран школ, Семёновка) – рушла.
Эвелина Антропова, Йошкар-Оласе 2-шо номеран школышто тунемше, 11-14 ияш-влак коклаште марла почеламутым лудмо дене икымше верыш лектын. Чолга, марий шўлышан ӱдыр тӱрлӧ семын вияҥеш. «Воштончыш» театрыш коштеш, «Марий памаш» ансамбльыште кушта.
– Сылнымут тӱням йӧраташ да умылаш авам кумылаҥден. «Ямде лий» газетым изиэм годсек налеш. Кызытат мый ты газет дене кылым кучем. Кажне лаштыкшым шергалам. «Воштончыш» театрыште тӱрлӧ рольым чоҥаш келша. Кушташ да мураш икымше классыште тунеммем годым кумылаҥынам. Тунамак марий муро деке шўмаҥынам, – ойла Эвелина.
Ӱдыр сценыш лўдде лектеш. Марий улмыж дене кугешна. Тӱрлӧ конкурсышто мастарлыкшым терга. Йоча пагытыште налме усталык ончыкылык илышыште пайдам гына конда.
