Японий Тихий океанысе отрошто верланен. Тушто пӱртӱс поянлык: чодыра, олык, куп да моло – шагал. Сандене тусо калык пӱртӱсым чотрак шижеш да акла. Пӱртӱсын сылнылыкшым ончыкташ моткоч шуко шомакым кучылтеш. Йӱрым 120 тӱрлын сылнештарен ойла. Мутлан, сакурамантай – сакурын шошым пеледмыжым ончен куанымаш. Идалыкын кажне пагытшым ончыкташ коло ныл тӱрлӧ мутым кучылтеш. Европышто илыше-влак дене таҥастараш гын, япон-шамыч 240 тӱсым палат.
Школышто тунемме программышт моло элла дечын ойыртемалтеш. «Пӱртӱсым ончен куанымаш» урокым посна предмет семын пеҥгыдемдыме. Тиде природоведений але географий огыл! Урокын шонымашыже –тунемше-влакым Интернет, тӱрлӧ технике деч кораҥден, йырвелым шымлаш, аралаш туныкташ.
Тӱрлӧ пагытыште йоча-влак, экскурсийыш лектын, пеледалтше пушеҥгым, шонанпылым, тӱтырам, пылым да моло пӱртӱс явленийым эскерат. Мутлан, шыжым эн оҥай да эн мотор йошкар ваштар лышташым кычалыт. Тидыже момидзигарий маналтеш. Пӱртӱсын флорыжым да фауныжым шымлыше йочалан моло урокысо семынак отметкым шындат, экзаменым сайын кучат.
