«Жапым кӱлеш семын кучылт моштет гын, чыла ыштен шуктет», тыге ойла Йошкар-Оласе МЧС службышто инженерлан пашам ыштыше, Российын спорт мастерже, «Рать» спорт клубышто панкратион дене тренер М.Э.Сабанцева. Самырык ӱдырын вий-куатшылан куанаш веле кодеш. Тудо тӱрлӧ кӱ кшытан чемпионатлаште мастарлыкшым терген, сеҥыше радамыште лийын. Тале спортсмен дене вашлийын мутланышна.
– Марина Эриковна, панкратион дене утларакше рвезе-влак кылым кучат. Тендан кумылдам спортын ты видше мо дене савырен?
– Панкратион студент годым чонышкем шыҥен. Ик гана таҥасымашке ушнымеке, ӱмырешлан йӧратен шынденам. Ынде куд ий профессионал спортсмен семын таҥасымашлашке коштам. Чоным почын каласен кертам: тудо рвезе-влаклан веле огыл, ӱдыр-шамычланат пайдале. Чытышым, пеҥгыдылыкым ешара, капкылым шуара.
– Панкратион дене мыняр ияш гыч кылым кучаш лиеш?
– Кызыт мый эн изи ийготан-шамыч дене пашам ыштем. Группыш 5-7 ияш икшыве-шамыч коштыт. Кок ӱдыр уло. Нуно рвезе-влак деч вараш огыт код: тунемыт, рингыш лектыт. Спорт дене кылым изинек кучет гын, нигунам от кудалте.
– Ньога-влакым кумылаҥдаш могай йӧным кучылтыда?
– Йоча-шамычын энергийышт мыланемат сита. Нуно моткоч писе, чулым улыт. Занятийым модмо йӧре, но тыгодым физический нагрузко дене эртарем. Шерышт ынже тем манын, упражнений-шамычым вашталтылам, мокталтем.
– Йоча дене пашам ыштыме годым эн ончыч мом шотыш налман?
– Ӱдыр-рвезе-влак тӱрлӧ койыш-шоктышан улыт. Кажне дене кылым муын моштыман. Икте пеҥгыдынрак ойлымым вуча гын, весе – мӧҥгешла. Приёмым тунемме годымат тыгакак. Кӧ гын иканаште тунемеш, кӧлан гын утларак тренировкым эртарыман. Куштылгырак упражнений гыч тӱҥалын, эркын-эркын нелыракыш куснена. Тренировкыш йоча шке кумылын коштеш гын, сеҥымашыш писынрак шуэш. Сандене ача-ава-влаклан тидымат шотыш налман. Йочам кумыл деч посна коштыктыман огыл.
– Тӱрлӧ таҥасымашыш коштмо деч посна ончыкылык чемпионым кушташ ок лий, маныт. Тидын дене келшеда?
– Кунам чемпион марте корным шке эртет, тунам палет, мо тиде тыгай. Мыняр чытыш да вий кӱлыт. Кызытеш ме республикысе таҥасымашке ушнен огынал, но спорт клуб кӧргыштӧ таҥасымаш-влак эртаралтыт. Кучедалыт, вийыштым, мастарлыкыштым ончыктат, сеҥымашлан куанат. Таҥасымаш годым йочан вий-куатше утларак палдырна. Икмыняр ий гыч изи спортсменем-влак коклаште икмыняр чемпион лиеш манын ӱшанем.
