Марий йылме да литератур дене регион-влак кокласе олимпиадыште Марий Эл, Башкортостан, Татарстан республикла да Свердловск кундем гыч 34 ӱдыр-рвезе уш-акылжым терген.
Марий Эл Республикысе туныктыш да шанче министрын алмаштышыже В.Г.Гаврилова туныктышо да тунемше-влаклан таумутым ойлен.
Олимпиадыш толшо кажне унан чоныштыжо куан кумыл шижалтын.
– Марий йылмым шочмо йылме семын 14 районышто туныктена. Тидлан кугу тӱткыш ойыралтеш. Олимпиадыш Балтач, Мишкан, Пӱрӧ районла гыч куд тунемшым конденна. Икшыве-шамыч Йошкар-Олаш икымше гана толыныт. Нунылан таҥасаш да уна лияш – кугу пиал,– ойла Пошкырт кундем Мишкан район Яныш Ялкайн лӱмеш Чорай гимназийыште марий йылмым да литературым туныктышо Анжелика Леонидовна Юзукбаева.
Кӱлын тыршеныт
Олимпиадыште марий йылме дене 1-ше верым Валерия Кузьмина (Курыкмарий, Пистерлӓ, 9-ше класс), Дарья Загайнова (Советский, Кельмаксола, 10-шо класс), Ольга Степанова (Морко, Унчо, 11-ше класс) сеҥен налыныт.
– Марий йылме дене районышто эртаралтше олимпиадыш 4-ше классыште тунеммем годым икымше гана ушненам. Тунам мыйым туныктышем Людмила Александровна Александрова ямдылен. Ондак сеҥышыш лектын омыл гынат, тиде татым эре вученам да йылме дене правил-шамычым тыршен тунемынам. Тыге регион-влак кокласе йыжыҥыште ынде кокымшо гана шке вием тергенам. Сеҥымашыш шумаште марий йылмым да литературым туныктышо Римма Николаевна Петровалан кугу таум каласем, – ойла Ольга Степанова.
Марий литератур дене 1-ше верыш Юлия Канашина (Параньга, Кугу Пумарий, 9-ше класс), Злата Михайлова (Татарстан, Агрыз, Буймо, 10-шо класс), Людмила Калинина (Параньга, Матародо, 11-ше класс) лектыныт.
Шочмо йылме мыланна эн шерге. Тудо калыкын эн кугу поянлыкше. Самырык тукым йылмым палышаш да волгыдо ончыкылыкшо верч тыршышаш.
Фото-влакым МарГУ-н «Вконтакте» соцкылысе тӱшкаж гыч налме.
