«Кугуракым пагале, изиракым чамане» калыкмутым Морко район Унчо школышто тунемше йоча-шамыч раш умылат. Садлан тимуровец-влакын отрядыштым чумыреныт. Шоҥгыеҥ-влаклан кертмышт семын полышым пуат. Шукерте огыл Е.П.Митрофанова деке миеныт. 84 ияш кова илыш корныжым, сар годсо пагытым шарналтен. Йоча-влак Елена Петровнам шушаш пайрем дене саламленыт, пӧлекым кучыктеныт.
О.ВАСИЛЬЕВА.
