Дарья Герасимова Шернур район Мушкыдӱҥ ялыште ила. Шернур посёлкысо 2-шо номеран школышто кумшо классыште тунемеш. Изиж годсек вольыклан шӱман кушкеш. Коча-коваже ожнысек ятыр вольыкым ашненыт. Даша мом пукшымыштым, кузе йӱктымыштым эре эскерен, полшен. Ӱдырын изачаже – фермер. Ушкалым, презым да сӧснам ашнат. Ушкалым эше лӱштен огеш мошто, но аважым ончен тунемаш тырша. Эн чот презым йӧрата. Шочын вочмекышт, нуно чылт йочала чучыт. Ӱнарышт укелан кӧра лӱҥген-лӱҥген коштмыштым ончен, чот чамана. Вашке кушкышт, вийым погышт манын, лӱмын келыштарыме ате гыч шӧрым йӱкта.
Кажне вольыкыштын шке лӱмышт уло. Ушкалын лӱмжӧ могай буква гыч тӱҥалеш, презыланат тугай гыч тӱҥалшым пуат. Мутлан, аваже Зева гын, презыже – Зефир але ушкал – Дуня, презыже – Долина, ушкал Булка гын, презым Барон манын лӱмденыт. Лӱмыштым шарнен кодаш манын, пылышышкышт биркым пижыктен шындат. Вӱташ пурымо годым кажныж дене мутланат. Даша кеҥежым кӱтӱш ужатен колташ, а кастене мӧҥгеш поктен кондаш йӧрата.
Зева – Зефир…
