Кажне гаяк икшыве школышто тунеммыж годым «Ямде лийыш» воза. Йоча газет ятыр еҥлан сылнымут тӱняшке корным почеш. «Ямде лийын» эртарыме тӱрлӧ конкурсышко, слётышко ушнен, мыняр йоча усталыкшым вияҥда, шинчымашыжым келгемда, калык ончылно шкем ӱшанлын кучаш тунемеш?! Нунын кокла гыч иктыже – марий мурызо Алина Семёнова (Макарова). Тудын дене юнкор жапыш уэш пӧртылна.
– Алина, «Ямде лий» дене кунам палыме лийынат?
– Сотнур школышто тунеммем годым «Ямде лийым» кидышкем икымше гана кученам. Тунам газет эше тӱрлӧ тӱсан лийын огыл. Чолга юнкор-влакын пашаштым куанен лудынам. Сылнымут дене кылым кучаш туныктышына Анатолий Александрович Сапаев кумылаҥден. Урок деч вара юнкор кружокыш коштынна. Газетеш ятыр почеламутем савыкталтын. Мый моло йоча семынак ава, пӱртӱс нерген возаш тыршенам. Тунам ны размерым, ны рифмым пален омыл. Туныктышына тӧрлаш полшен. Савыкталтше почеламутем-влакым газет гыч пӱчкеден луктынам. Нуным кызытат аралем.
– Чолган возкален шогыметлан тыйым «Марий юнкор» слётышко ӱжыныт.
– Туге. Тӱрлӧ район да республикла гыч чолга юнкор-влакым иквереш ушышо слётышко логалаш мыланемат пиал шыргыжалын. Эсогыл кок гана миенам. Тушто шуко йолташым муынам, серызе-влак дене вашлийын, урок сынан занятийлаште шинчен, шинчымашемым пеҥгыдемденам, сылнымут дек утларак шӱмаҥынам.
– Тый почеламутым эн сайын возышо автор семын Антонов Ивук лӱмеш премий дене палемдалтынат. Тиде пагытым кузе шарналтет?
– Тиде 2010 ийыште лийын. Мыланем кубок ден дипломым кучыктеныт. Нуным кызытат аралем да кажне гана ончалме годым юнкор жапыш уэш пӧртылам. Икана Алана ӱдырем ужын да коваж деч йодын: «Статуэткым кӧ пуэн?» Тудыжо вашештен: «Ават конкурсышто сеҥен. Почеламутым возымыжлан пӧлекленыт». Алана изи гы-нат, почеламутым рушла возаш тырша. Тидыже пеш куандара. Кугурак лиймекышт, ӱдыремымат, эргымымат марий йылмылан кумылаҥдаш шонем.
– Тый кызыт марий эстрадыште палыме улат. Кугу корнышко лекташ «Ямде лий» газетат полшен, очыни.
– Газет дене кылым кучымемлан ик ганат ӧкынен омыл. Сылнымутышко икымше ошкылым ышташ, шинчымашым келгемдаш йӧным ыштен. Иктаж 7-ше классыште тунеммем годым икымше мурем лектын. Мутшым шкеак возенам. Кызытат мурылан шомакым шкеак серем. «Ямде лийлан» тауштен илем.
