Тыге ойла Йошкар-Оласе 17-ше номеран школын 1-ше классыштыже тунемше Артём ЯГОДАРОВ (снимкыште). Тудын дене «Колумб лудмаш» оласе конкурсышто палыме лийынам. Марий сем почеш тавалтен шогышо изи рвезе деч «Очыни, артист лият?» – йодым.
– Мый тале гармоньчо але артист лиям, – лие вашмут.
Артём ачаж ден чӱчӱжым ончен тунемеш. Нуно коктынат семӱзгар дене шоктат. Рвезе ачажын гармоньжым шукертак шупшкеден ончен.
– Теве изиш кугурак лиямат, гармоньым шокташ тунемамак, – ойла Артём. Кызыт тудо Республикысе марий тӱвыра рӱдер пеленысе «Падыраш» йоча ансамбльыш коштеш. Тушто мураш, шкенжым сценыште кучаш тунемеш, шалдырма дене (трещотка) шокта.
