Книгагудо пашаеҥ сылнымут тӱняшке корным почеш. Кажне толшым порын вашлиеш, кӱлешан книгам муаш полша. Шернур посёлкысо К.Васин лӱмеш книгагудышто паша кажне кечын шолеш. Йоча пӧлкаште ӱдыр-рвезе-влакым С.А.СЕРГЕЕВА вашлиеш.
– Светлана Аркадьевна, у технологийым илышышке шыҥдарыме дене паша радамда вашталтын мо?
– Йоча-влак Интернетыште жапым утларак эртарат гынат, книга акшым йомдарен огыл. Интернетын кӱлешлыкше нерген чылан палат. Меат илыш дене тӧр каяш тыршена. Лудшына-влак д-не онлайн йӧн дене пашам ышташ тунем шуынна. «ВКонтакте» соцкылыште группына уло. Конкурсым, ончерым эртарена. Тӱрлӧ акцийыш ушнена.
– Йочам книгам лудаш кузе кумылаҥдеда?
– Ушан да поро кумылан йочам книга деч посна кушташ неле. Ме книгам лудаш кумылаҥдышаш улына. Тиде эн тӱҥ сомылна. Йоча-влак книгам йӧратышт манын, тӱрлӧ йӧным кычалына. Библиотекыште «Книга дене пырля куш, ньога!» ушем пашам ышта. Еш дене лудашат йӧн уло. У книга-влак дене палымым ыштена, калык модыш дене модыктена, мастер-классым, почеламутым сылнын лудмо конкурслам эртарена. «Ончыкылык библиотеке – йочан да книгагудо пашаеҥын шинчаончалтышышт дене» теме почеш сӱретым сӱретлен, «ВКонтакте» соцкылыште увертарыме «Мыйын йӧратыме библиотекем» конкурсыш шукерте огыл ушненна.
– Тачысе кечын йоча-влак могай книгам утларак лудыт?
– Тӱҥалтыш класслаште тунемше-влак ойлымашым, йомакым йӧратат. Кугурак икшыве-влаклан приключений, фантастике сынан произведенийла келшат.
– Марий книга-влакым куанен лудыт?
– Чаманен каласем, марий сылнымутым лудмо шотышто пашана изиш «окшакла». Йоча-влак школышто марий йылмым тунемыт гынат, марла шагал лудыт. Школысо программыш марий литературым тунемме шагатым ешарат гын, лудшына-влак шукырак лийыт, шонем.
– Кузе шонеда, ончыкылык книгагудо могай лийшаш?
– Книгагудо книгам аралыме вер веле огыл. Тушко толмеке, кажне еҥ канышаш, яра жапшым пайдалын да оҥайын эртарышаш. Мыланна книга эн шерге, а лудшо-влак эре вучымо улыт.
