Тыге ойла Азалия Ганеева – Пошкырт кундемын моторжо. Тудо Пӱрӧ олаште шочын. Икымше номеран кыдалаш школышто 6-шо «А» классыште «4» ден «5»-лан тунемеш. Ӱдыр изиж годсек шкенжым тӱрлӧ аланыште шуара. Икымше класс гыч куштымаш дене кылым куча. «Импульс» куштымаш театрыш коштеш. Тушто эстраде куштымаш-влакым тунемеш. Тидлан М.А.Плотникова туныкта. Театрыш коштшо-шамыч кодшо ийын Моско олаште всероссийский конкурс-фестивальыште чолгалыкыштым ончыктеныт да II степенян лауреат лийыныт. Азалия шкенжым сценыште кучаш тунемеш, Л.И.Кузнецован полшымыж дене театр илыш дене лишкырак палыме лиеш.
Азалиян илышыштыже спорт кугу верым айла. Ондак каратэ дене пеҥгыде кылым кучен. Сеҥен налме медаль ден грамотшо-влак тачат чонжым ырыктат. Но тазалыклан верч спортын ты видшым коден. Баскетболла 3 ий наре модеш. Физкультурым туныктышо да тренер А.М.Ляпустин тунемше-влакым сайын шуара.
– Мыйын авам – марий, а ачам – башкир. Кеч марла шагал мутланем, но тудым сайын умылем. Шкемым марий ӱдырлан шотлем. Тидын дене нимучашдымын кугешнем, – ойла Азалия Ганеева.
